Dan loa lo pemte kan pawm ngai lo ang - Manipur CM

Manipur chief minister N Biren Singh chuan a kaihhruai sorkarna hnuaiah dan loa hmun dang aṭanga an state-a lo pemte chu an pawm ngai loh tur thu leh, a ram mi dik takte chu ram leilung nen an inzawmna an theihnghilh loh nan chiah piah an ni tur a ni lo, tiin a sawi.

Chief Minister chuan Myanmar-a innghat, Chin Kuki Liberation Army (CKLA) hel pawl mi leh sa pahnih, Churachandpur-a man an ni chuan an state chhunga hnam pahnih inkara buaina chhuakah pawn lam mi an inrawlh nasa tih a lantir thu a sawi."Sorkarin a hriat community 34 leh hnam nunphunga inzawm tlatte inlaichinna vawng nung tur hian in mi thlawpna ka dil che u a ni. Mahse, eng dinhmunah pawh, pawn lam mi rawn pemte chu Manipur-ah hian pawm an ni ngai lo ang," tiin, Imphal east district-a Andro hmuna project pathum atana lungphum a phumnaah a sawi a ni.

Singh chuan Moirang-a ethnic park chu ram leilung fa, hnam 34 te nunphung tarlangtu a nih thu leh, mipuite inkara inzawmna tinungtu a nih thu a sawi a, "Kan state chhunga buaina hi sorkar laipuiin a mawhah a la a, NIA-te pawhin sakhua emaw, hnam tlem zawk nihna emaw thil avanga buaina ni loin Manipur-a hel pawl awmin Myanmar leh Bangladesh lamte puihna hmanga India sorkar an dona hmanrua a ni tih an sawi a ni," a ti. "Sorkar laipui leh Manipur sorkar hian pawn lam aṭanga dona leh buaina an lo tawk fo tawh a, kan la tawk zel bawkin ka ring. Hmun him lo zual laiahte chuan sipai pawh dah luh belh zel an ni," tiin a sawi.

Manipur-ah hian May 3-a tualchhung buaina a chhuah aṭang khan boruak ṭha a la awm hleithei lo a, CM chuan phalna nei loa bunker sakte an tihchhiat tur thu sawiin, ralthuamte man a, misualte pawh man zel an tum thu a sawi a ni.