District tinah sorkar college a awm tur a ni : Nagaland CM

Shamator district-a Yimkhiung Tribal Council (YTC) in Platinum jubilee an hman mekah Nagaland chief minister Neiphiu Rio chuan thu sawiin, Nagaland-a district zawng zawng chuan sorkar college an neih a ṭul thu leh, sorkar pawhin chutiang tura hma a lak mek thu a sawi.

Chief Minister chuan,"Yimkhiung leh Tikhir mipuite'n hun kal tawha in boruak dah ṭha a, zai khata in lo luang thei hi ka lawmpui em em che u. Harsatna chinfelna entirna ropui tak in hnutchhiah a, mahni thlahtute ram ngeia inrem taka khawsa ho tura in inlungrual thei hi thil chhinchhiah tlak tak a ni," a ti.

Shamator hi kum 2022 khan district-ah hlan kai a ni a, Yimkhiung Tribal Council (YTC) leh Tikhir Tribal Council (TTC) te'n inremna, eng tribal council mahin hmalakna an nei chhunzawm tur a ni lo tia an ziah hnuah tribal hnam pahnihte hian inchuh buai loin ram an luah chhunzawm a ni.

Rio chuan sorkar hmalakna neih hrang hrangte sawi langin, mipuite chu sorkar hmalaknaa an tana hamṭhatna awm thei ngaihven tur leh, Chief Minister's Health Insurance Scheme (CMHIS) hnuaia a thlawna inentirna siam ṭhin chu hmang ṭangkai turin a hrilh. Jubilee lungphum hawngin, online-in SASCI hnuaia siam, NEFA kawng, Shamator soil colony leh Sangphur pawhtu chu a hawng bawk.

YTC platinum jubilee-ah hian Tenyimi Union president, CNTC president leh ENPO president-te'n thu an sawi bawk. Jubilee-ah hian Celebrating togetherness tih chu thupuiah hman a ni. YTC hi January 1, 1948 khan Huker khuaah din a ni.