Gadkari-a'n NH projects lungphum a phum

Union Minister for Road Transport, Highways and Shipping Nitin Gadkari chuan Inrinni khan lei pahnih dawhna tur lungphum a phum.

Lei dawh tur hi Majuli thliarkar lui kaltlanga Jorhat leh North Lakhimpur inkalpawhna tur leh, Desagmukh kaltlanga Lakhimpur-Sivasagar district inkal pawhna turte a ni.

Union Minister hian NH-37 Moran, Dibrugarh district-a four-lane pali siam tur Abhayapuri Stadium-ah lungphum a phum nghal bawk. Kawngpui siam thar tur te chu - Demow to Moran (26.9 km), Moran to Bogibeel (19 km), Nagaon Bypass to Rangapara (18.4 km) leh Rangapara to Kaliabor Tiniali (18.315 km) te an ni. Heng National Highway pali siam nan hian chengvaibelchhe 1,230.867 ruahman a ni. Minister hian National Highway dang siam lehna tur Detailed Project Report (DPR) chu pawm a nih thu a sawi a, hei bakah hian lei engemaw zat siam belna tur project siam mek a ni, a ti bawk.

Gadkari chuan sorkar laipui chuan kum nga lo awm leh tur atan hmarchhak state ten infrastructure lama hma an sawnna tur cheng vaibelchhe nuai khat a ruahman a ni,a ti. Kawngpui cement-a siam tur engemaw zat a awm mek a, heng te hi enkawl zui ngai tur a ni dawn a, ṭhalai 1,50,000 chuangin hna-thawh tur an neih phah dawn niin a sawi bawk.

Minister chuan hna thawk tur hian ram mi leh sa duhsak an ni dawn a, hei hi project-in a tum pakhat a ni, a ti. Gadkari chuan, hei hi hmarchhak hmasawnna tur a ni a, National Highways and Infrastructure Development Corporation Limited (NHIDCL) head office pawh Guwahati-ah din a ni tih a sawi. NHIDCL hian project 10 a thawk mek a, project dang pali pawh thawh ṭan mai theih tura ruahmanna siam a ni.

Gadkari chuan,"Hmasawnna chu hnathawh tur nei lo leh retheihna nuai bo a nih phawt loh chuan a kal chak thei lo a ni. Infrastructure development project hian hna tam tak a siam dawn a, retheihna lak ata min khai chhuak theitu ṭha tak a nih ka beisei" a ti. Inbiakpawhna leh inkalpawhna ṭha chuan insumdawn tawnna ṭha zawk a thlen ang a, chhu chuan economy nasa takin a ti ṭhang dawn a ni, a ti.

Hmarchhak chu natural gas, crude oil leh mining ores-ah state dang aiin a hausa a, inkalpawhna a ṭhat chuan heng leilung hausakna te hi hai chhuah a ni ang a, kum reilo te ah chuan hmasawnna nasa tak a thleng thuai dawn niin minister chuan a sawi.

Moran-a meeting neih ah hian Union Minister of State for Sports and Youth Affairs, Sarbananda Sonowal leh State PWD Minister Ajanta Neog ten thu an sawi ve bawk. Sonowal chuan hmasawnna tur project tam tak siam a ni chu lawmawm a tih thu sawiin, Prime Minister Narendra Modi leh Union Minister for Road Transport, Highways and Shipping Nitin Gadkari chungah state aiawhin lawmthu a sawi a ni.