Railway Budget-ah Kan thil phut ngaihthah : Gogoi

Assam Chief Minister Tarun Gogoi chuan Railway Minister Suresh Prabhu-an Railway Budget 2016 a pharh takah khan Assam state thil phut hrang hrangte chu telh a ni ve lo tih a sawi.

Railway Budget pharh tak chu a lungawi thlak loh hle tih sawiin Tarun Gogoi chuan, "Prime Minister leh Railway Minister hnenah hian kum 2014 aṭang khan
ṭum nga zet lehkha ka thawn tawh a, kan state mamawh hrang hrangte ka thlen a ni. Kan thil phut zinga ṭhenkhat chu tihhlawhtlin ni mah se, a tam zawk erawh min ngaihthah sak a ni" a ti.

Gogoi chuan Railway Budget-a telh tura rawtna a thlente chu mipui hriata puangzar turin Assam State BJP president leh Union minister Sar-bananda So-nowal chu a phut bawk.

CM chuan, "Sara-banandd Sonowal hi Assam assembly election neih tura BJP chief ministerial candidate atana puan a ni a, hei vang hian state mipuite thil phut chungchang sorkar laipuia thlen chu a tih tur a ni a, amah ngei pawh central-a minister a nih avangin he state hian tan hian hamṭhatna tam thei ang a haichhuah sak tur a ni" a ti.

State sorkarin a thil phut a thlen tawh zingah Agiathuri station-a coach maintenance facility dah te, Assam khawthlang lama rel kawng tihlen leh, Guwahati thlenga electric eng pek tura a ngenna chu Railway budget-ah hian telh a ni. Mahse an state-a coach factory dah an phutna te, Saraighat bridge bula rail bridge dah an dilna te, hmun hla zawka tlan thei rel service tura an ngenna te, an state tana rel tam zawk pek an dilna te, hmarchhak tan bika railway zone siam hran an dilnate chu Railway ministry chuan a hnawlsak a ni, tiin Gogoi chuan a sawi.

CM chuan central-a BJP kaihhruai NDA sorkarin an state tana special category status a tihtawpin nghawng
ṭha leh pawi tak tak a neih theih dan tur chu hrethiam pha loha BJP hruaitue a puh bawk.