AP-ah sorkar sikul 400 khar a ni tawh

Arunachal Pradesh chief minister Pema Khandu chuan an state-ah sorkar sikul, zirlai nei lo sikul 400 chuang khar a ni tawh tih a sawi.

Balek-a Government Secondary School platinum jubilee lawmnaah Chief Minister hian thu sawiin,"Zirna hi kan la thutak em em a, chumi lantir nan chuan sorkar sikul, zirlai nei lo 400 chuang kan khar tawh a ni," tiin sikul din belh aiin sikul awm saa zirna ṭha ber ber chhawp chhuah chu a ṭul zawk niin a sawi a ni.

CM chuan Arunachal Pradesh sorkarin a tum ber chu sikul awm sa hmanga zirna ṭha zawk pek theih a ni a, chumi hlawhtlinna tur chuan sorkar pawhin a theihtawp a chhuah tur thu leh sikulin a mamawh apiang pek theih a tum dawn a ni, a ti. Sikul ṭhenkhata hmunhma chhe lutuk leh zirtirtu indaih lohna awm ṭhin chu intihlawm tumna politics vang a nih thu sawiin, a kaihhruai sorkar chuan chutiang ni loa, hmalakna tluantling leh ṭha zawk a ngaihpawimawh thu a sawi.

"Zirna ṭha leh dik kan pe em tih aiin sikul din belh lamah kan ṭang nasa lutuk a, heng sikula zirna ṭha tawk lo hian eng nge a nghawng theih tih pawh hre loin kan kal mawp mawp ṭhin hi a pawi a ni," tiin, Khandu chuan India-in zalenna a hmuh hmaa sikul din lo ni tawh zawng zawngte chu 'Heritage school' a nih tawh tur thu a puang bawk. Heng sikulte thawm ṭhat leh tihchangtlun chu hna hmasaa neih a nih tur thu leh, sikul compound-a museum dah vek tum a nih thu a tarlang.

Balek government secondary school hi 1946 khan lower primary shcool anga din a ni a, CM hian platinum jubilee a hmanpui rual hian heritage schol-ah a puang nghal a ni. Balek government secondary school chu kum 75 a din chhunga mi ropui tak tak a chher chhuah tawh avanga fakin, he sikula lo kal tawh, lo thawk tawh leh tuna thawk mekte chu lawmpuina a hlan.