Nagaland Autumn festival New Delhi-ah

Nagaland Tourism department leh sorkar laipui hnuaia Ministry of Tourism ṭangkawp chuan November 3 leh 4 hian New Delhi-ah Autumn Festival ṭum hnihna tur an buatsaih dawn.

Hornbill festival bul ṭanna anga hman, autumn festival-ah hian kut themthiam thil chi hrang hrang bakah, ei turte, intihhlimna te buatsaih ṭhin a ni. Festival ni hmasa zawk, November 3-ah hian sawm bik chin chauh kal theih tur a ni dawn a, a ni hnihna, November 4-ah hian mipui a duh apiang tana chhim theih turin hawn a ni thung ang.

Nagaland tourism minister Temjen Imna Along chuan autumn festival atana a phur tawh thu sawiin,"Nikum lama festival hlawhtling taka kan buatsaih tawh thlir letin, kuminah hian a aia nasa leh ropui zawka huaihawt leh tum a ni. Hnam ziarang pho chhuahna piah lamah, rimawi, art leh tualchhuak thil siam chi hrang hrangte pho a ni dawn. He autumn festival kaltlang hian Nagaland kal thei lo tana Nagaland-a an hmuh leh tawn theihte temtir an ni ang a, a kal theite pawhin a hlutna an hriat chian leh zual beisei chu kan tum ber a ni" a ti.

Autumn festival-ah hian Nagaland hnam hausakna leh mawinate chu mithiam bikte leh sumdawnna nena kaikawpin pho chhuah a ni dawn a, Runway India te, Made in Nagaland, Woven Threads, Fusion Nagaland, Ikali's studio, Kintem te pawh an inlan ang. India chef ṭha zual 30 zinga thlan, chef Aketoli Zhimomi pawhin a thil siamte lei theih turin he festival-ah hian an chhawp chhuak dawn bawk.