Kristiante'n Cherry Blossom tawp ni tur an duh lohna lantir

Meghalaya United Chirstian Forum (MUCF) chuan Meghalaya sorkar hnenah Shillong-a cherry blossom festival hman hun chungchangah Pathiannia festival tawptir tum a ni chu an duh loh thu hrilhin, Kristiante ni serh zahna lantira cherry blossom festival tawp ni tura ruat chu sawn turin an ngen.

Madan Kurkalang, Bhoirymbong-a lawm tura buatsaih, Shillong Cherry Blossom Festival hi November 17-19 chhung hman tur ruahmanna siam a ni a, a tawp ni tura ruahman, November 19 hi Pathianni a nih avangin Meghalaya-a Kristian pawl hrang hrangte chuan sawn turin an lo ngen tawh a ni.

MUCF chairman, Rev. Batkupar Dunai chuan ni tin hi Pathianin a pek a ni tih chu an pawl rin dan a ni a, chutih rualin Pathianni chu a thianghlim bik avang leh, kohhran hrang hrangte'n Pathian chibai bukna hun atana an hman leh Biak Ina an kal khawm ni a nih thu a sawi. "Chanchinthara kan lo hmuh angin Cherry Blossom festival chu Pathiannia tawp tura ruahman a ni a, hei hi state sorkar hian uluk zawka ngaihtuah a, Meghalaya-a Kristian tam takte rilru tur dawn chunga a sawn thei a nih chuan MUCF chu thinlung takin kan lawm ang," a ti. Rev. Dunai chuan Pathianni chu Kristiante hun serh leh Pathian chibai buk ni a nih avanga rilru la peng theitu thil dang awm lo tura sorkarin hma a lak a duh thu a sawi bawk.