Dan kalha che te na taka hrem an ni ang : Assam DGP

Assam Director General of Police Mukesh Sahay chuan kar kalta Zirtawpni khan State Assembly election lo awm turah dan leh thupek khauh taka kenkawh a nih tur thu a sawi a, dan kalha che te chu na taka hrem an nih tur thu a sawi.

DGP chuan, inthlan kan hmachhawn tawh tam takah candidate thenkhat hel pawl suma tham an awm ṭhin tih sawiin, he tiang thil ti emaw, sum hmanga midang tihlungawi tum emaw an awm ṭhin thu a sawi a ni.

Mukesh Sahay chuan, "Unlawful Activities Act hnuaiah heng thil thil titute hi hrem theih an ni a, hel anga ngaih theih an ni" a ti. Polling Booth zawng zawng zinga a zatve chu hmun hima awma ngaih a ni a, 8,000 chu engemaw thu hlaa ven ngun ngai leh a dang 3,000 chu ven uluk ngai bik hmuna awm te a ni tih DGP chuan a sawi. Heng hmunah te hian mipuite fimkhur turin a ngen a, ralmuang taka inthlan hi kalpui a nih theih nan nasa taka an inbuatsaih thu a sawi.

Police te chuan ralthuam 63, silaimu 800 chuang, granade 47 leh bomb siamna hmanrua gm 800 chuang chu helpawl, National Democratic Front of Bodoland (NDFB) ho awmna Bodoland Territorial Area Districts (BTAD) aṭangin an man tawh a ni.

Assam DGP chuan an ṭhenawm state, a bikin Meghalaya leh Nagaland atang tein helpawl engmahin State Election chu an ti buai tur a ni lo, a ti. He mi chungchangah hian sorkar hotute nen pawh an inbiak tawh thu a sawi.

Hmarchhak bialah hian hel pawl lian tak tak United Liberation Front of Assam(ULFA), Garo National Liberation Army (GNLA) bakah pawl dang engemaw zat an awm mek a ni.