Manipur Congress MLA te Home Minister lakah lungawi lo

Naga Students’ Federation ten an nawrna avanga Manipur police panga suspend an nih chungchangah Manipur-a rorel lai Congress MLA 20 chuang chu Home Minister Gai-khangam lakah an lungawi lo.

Congress MLA N. Biren chuan,"Inrinni zan khan ka chenna inah emergency mee-ting kan nei a, Chief Minister Okram Ibobi Singh chu Home Minister Gaikhangam lakah action la turin kan phut a ni, he mi chungchang ngaituah tur hian Special meeting neih turin Congress Legislature ten neih kan phut a ni" a ti.

NSF te chuan February ni 23 aṭang khan Naga ram chhunga Manipur mite lirthei engemawzat chu dan an ni a, February 14-a Mantri Pukhri, Imphal bula duty Manipur police pangate chu sorkarin a suspend tak avangin NSF te pawh hian lirthei an dan chu an tawp san ve nghal a ni. Mahse hei hi rorellai Congress MLA engemaw zatin duh loin, lungawilohna an lan tir ve leh a ni. Police suspend an nih duh lotu zingah hian Congress MLA 20 bakah, All Manipur Students’ Union, students’ organisations leh civil societies te an tel. Joint Committee on Inner Line Permit System convener, Khomdram Ratan pawhin sorkar thil tih chu demin, "Manipur sorkar chu Naga Students’ Federation (NSF) lakah a tlawm a ni" a lo ti ve bawk.