JMM hnuaiah Meghalaya-in tui connection 4,00,000 pe chhuak tawh

Sorkar laipuiin August 2019-a a tlangzarh, Jal Jeevan Mission (JJM) kaltlangin Meghalaya sorkar chuan tui connection 4,00,000 a pe chhuak tawh.

Meghalaya-ah hian kum 2019-a tui connection nei 4,550 an awm a, JJM kaltlanga hmalakna hnuaiah tun dinhmunah tui connection nei hi 4,00,812 an tling tawh a ni.

JJM hnuaiah hian thingtlang khuaa tui in tur thianghlim leh him an neih theihna atana hmalak a ni.Meghalaya chief minister, Conrad K.Sangma chuan an state hmalakna hi puangin, Jal Jeevan Mission kalpui tura thawktute chu a fak. "Meghalaya hian JJM hnuaiah hian in tina tui connection pek a nih theih nan hma a la a, in nuai 4 zetah hemi hlawhtlinna hi hmuh theih a ni ta a ni. A hlawhtlinna tura thawktute zawng zawng chungah state sorkar hmingin lawmthu ka sawi a ni," a ti.

Mission Director leh Public Health Engineering department-a state commissioner leh secretary, Syed Md. A. Razi chuan an state-in an thlen chin chu ropui leh chhinchhiah tlak an tih thu a sawi a, in tina tui connectoin pek a nih theih nan ṭan la chhunzawm zel tur an nih thu a sawi bawk. Meghalaya hian October 2022 khan ram pum huapa JJM hnuaia hnathawk ṭha lawmman pahnihna a lo la tawh a ni.

Jal Jeevan Mission hian kum 2024-a thingtlang in tina tui in tur thianghlim leh him pek vek theih chu a tum ber a ni a, Meghalaya-a in awm zawng zawng aṭanga 61% te chuan tui connection hi an nei tawh a ni. An ram leilung leh khaw ṭhut danin zir loin harsa deuh mah se, Meghalaya hian sorkar laipui hun tiam ral hmaa he scheme hi tihhlawhtlin an tum thu an sawi.