Assam : Nupui/pasal nei nawn turin sorkar phalna lak hmasak a ngai

Assam sorkar chuan a hnuaia hnathawkte tan nupui nei nawn turin sorkar phalna lak hmasak a ngaih thu a sawi. Mipa tan a nupui hmasa zawk chu a la dam a nih chuan nupui dang a neih hmain sorkarin a pawmpui hmasak phawt a ngaih thu chief minister Himanta Biswa Sarma chuan a sawi.

Chief Minister chuan hnam tihbik nei loin, an hnam emaw, an tihdanah emaw thiang mah se, nupui pakhat neih lai renga nupui dang neih chu sorkar hnathawk tan chuan phal a nih loh thu a sawi a,"An sakhuain phalsak mah se, nupui dang nei leh tur hian state sorkar phalna lak hmasak tho a ngai a ni. He dan hi hman aṭangin kan nei sa tawh a, tunah hian hman kan tum chho mek a ni," a ti. Sarma chuan a mipa thih hnuah a thihsan, a nupuite pahnih inkara ro chungchanga intihbuaina tam tak an tawn leh hmuh tawh thu a sawi bawk.

Sorkar thuchhuah hi October 20 khan Assam sorkar hnuaia hnathawk zawng zawngte hnenah sem a ni a,"Sorkar hnathawk tu mahin sorkar phalna leh remtihna lo chuan a nupui dam lai rengin nupui dang a nei tur a ni lo. Hetiang tho hian sorkar hnathawk hmeichhiate pawhin an pasalte dam laiin, sorkar phalna lo chuan pasal dang a neih phal a ni lo bawk," tiin an tarlang. Kumin kum tir khan Sarma hian Assam sorkarin nupui pakhat aia tam neih phal chu khap a duh thu a lo sawi tawh a,"Nupui pakhat aia tam neih phalna hi khap vat kan duh. September thlaa assembly-ah hemi chungchang bill hi put luh tum a ni a, kan tihlawhtling thei lo a nih pawhin January session-ah chuan kan pu lut tawh ang," tiin a lo sawi tawh a ni.