Court-ah Tarun Gogoi a zualko dawn

Assam state Special category status paihsak a nih vanga lungawi lo Assam Chief Minister Tarun Gogoi-a chuan Court-ah zualko a tum thu Thawhlehni khan a sawi.

Tarun Gogoi chuan,"Sorkar laipui thil tih danah hian kan lawm lo a, Special Category status aṭanga Assam state paihtu NDA sorkar hi court-ah ka khing dawn a ni" a ti. Thu thar thehdarhtu te hmaah thu sawiin Gogoi chuan, "Kan duh ber chu Special Category status-a dahlet leh a ni, chutiang tur chuan NDA sorkar hi kan phut a ni", a ti. North East Industrial and Investment Promotion Policy (NEIIPP) project chu sorkar laipui hian a paih bawk niin a sawi.

Gogoi chuan, sorkar laipui thil tih danah an lungawi loh thu sawiin, NDA sorkar hian state hmasawnna tur tam tak a tiṭhuanawp dawn a ni,a ti. Union budget 2016 pharh takah khan kum 2013-14 chunga Assam leh Special Category state ten sum an dawn tam tak chu telh a ni tawh lo a ni.

Sorkar laipui chuan Assam state chu tax cheng vaibelchhe 18,938 chhung turin a ti a, mahse 14th Finance Commission rawtna angin vaibelchhe 22,131 an chhung ang. Kum 2015-16 chhunga Assam state-in tax aṭanga sum a hmuh zawng zawng chu vaibelchhe 2,395 chauh a ni, hei hi sorkar laipuiin tax chhung tura a bituk zat aiin a tlem zawk daih a, heti a nih chuan cheng kum khatah cheng vaibelchhe 5,588 an chan dawn niin Gogoi-a chuan a sawi.

Non Lapsable Central Pool of Re-sources (NLCPR) category-ah nikum khan Assam hian cheng vaibelchhe 970 a dawng a, sorkar kumtharah erawh vai-belchhe 700 ah tihhniam sak an ni thung.

Gogoi chuan Prime Minister Naren-dra Modi-an an state a tlawh ṭum khan Bodoland Territorial Area District chu vaibelchhe 1,000 pek a tiam a, a takah chuan, vaibelchhe 100 pek an nih thu a sawi. Union Road Transport Minister Nitin Gadkari khan hmarchhak state tan kawngpui siam tharna tur leh lei dawhbelhna tur kum nga chung a tan vaibelchhe 1,00,000 dah a nih tur thu a sawi a, tun budget pharh takah erawh cheng vaibelchhe 5,000 chauh dah a ni thung. Special Category status-ah Koch-Rajbongshi, Tai-Ahom, Chutia, Moran, Motak leh Tea tribe te chu BJP sorkar chuan dah a tiam a, hei pawh hi politics hmanga inbumna mai a ni, a ti.