Covid-19 case Hmarchhak state dinhmun

Covid-19 kai awm lohna state zinga mi, Nagaland-ah chuan Chennai aṭanga haw mi pathumin hri hi an kai tih hmuh chhuah a ni. 

Nagaland health minister S Pangnyu Phom chuan hri kai hmuh an nih thu hi sawiin, Nagaland state chhunga hri kai hmuh chhuah hmasa ber an nih thu a sawi. Hri kai hmuh chhuahte hi Sharmik special train hmanga Chenni aṭanga hawng a ni a, Kohima-a DHD and Chedema-ah enkawl mek an nih thu leh, an dinhmun a ngaihtuahawm loh thu a sawi. Hri kaiten contact an neihte pawh chhui zui nghal an ni tih a sawi bawk. 

Nagaland-ah hian a hmain Dimapur-a sumdawng pakhat chu Covid-19 a kai tih hmuh a lo ni tawh a, mahse Gauhati Medical College and Hospital (GMCH) ah test leh enkawl a nih avangin Assam tally-ah telh a nih thung a ni. 

Manipur-ah pawh Pathianni zan khan Covid-19 kai pahnih hmuh belh an ni a, anni nen hian hri kai hmuh tawh hi mi 34 an tling tawh a ni. Hetih lai hian hri kai zinga mi pali chu enkawl dam an ni tawh. 

Hri kai hmuh chhuah belh pahnihte hi Churachandpur leh Noney district-a mi an ni a, Churachandpur district bikah hian hri kai hi mi 18 an awm tawh a ni. Manipur-a hri kai hmuh chhuah thar zinga a tam zawk hi state dang aṭanga hawte an ni. 

State sorkar ruahmannain lockdown avanga hmun danga tangkhangte hruai haw mek niin, mi 14,000 chu special train leh bus hire hmangin an haw tawh. Nimin tlai khan tangkhangte hruai haw thawh khatna atana rel hnuhnung chu Delhi aṭangin Manipur panin a chhuak. 

Official-te chuan tangkhang hruai hawte hi quarantine centre-ah khung hrang nghal zel an ni tih an sawi. Heng centre-te hi a tawt lutuk venna atan hruai haw hna hi chawlh lailawk a ni rih ang a, a thawh hnihna kalpui hun tur chu sorkarin a la ruahman leh dawn a ni. 

Assam-ah hri kai hmuh chhuah an pung chak hle a, nimin thlenga an state-a hri kai hmuh chhuah tawh hi mi 514 an tling tawh a ni.  Assam health minister Himanta Biswa Sarma chuan hri kai hmuh chhuah belh an nih thu hi puangin, Golaghat, Kokrajhar, Karimgang, Tinsukia, Sivasagar, Jorhat leh Dhemaji-a mite an ni. 

Hri kai hmuh chhuah tawh zinga 57 chu enkawl dam tawh niin damdawi-in aṭangin chhuah tir an ni tawh a, mi paliin he hri hi an thihpui tawh bawk.

Arunachal Pradesh pawh hri kai awm lohna state-a puan a nih hnuin, Pathianni khan  Delhi aṭanga bus hmanga haw zirlai pakhatin Covid-19 a kai tih hmuh chhuah a ni. 

Sorkar official chuan hri kai hmuh chhuah chuanna bus-ah hian mi 33 an chuang tawh tih sawiin, Delhi aṭanga chhuakin Uttar Pradesh, Bihar, West Bengal leh Assam-ah te an rawn chawl chho tih a sawi. Hri kai hi bus-ah a hnung bera chuanga ni tiin, a chuanpui dangte pawh enfiah vek an nih tur thu a sawi. Covid-19 kai hmuh chhuah hi a taksaa natna lang chhuak lo, asymtomatic a ni a, medical team-in uluk takin an enkawl mek. 

April 2 khan Arunachal Pradesh-ah hian Covid-19 kai pakhat chu hmuh a lo ni tawh a, mahse ani hi enkawl dam a ni tawh a ni. 

Pathianni zan khan Tripura-ah Covid-19 kai pathum hmuh belh leh an ni a, an state-a hri kai hmuh tawh zat hi mi 192 an tling tawh. 

Chief minister Biplab Kumar Deb chuan Pathianni khan sample 991 test a ni a, heng zinga pathum chu a positive tih a sawi. Hri kai hmuh tharte hi Rajdhani Express-a Delhi aṭanga haw te vek an ni tih a sawi bawk. Kar liam ta Inrinni khan Mumbai aṭanga rel-a haw, mi 16 chuan Covid-19 an kai tih hmuh chhuah a lo ni tawh bawk. 

Tripura-a hri kai zinga mi 12 chu Pathianni khan damdawi-in aṭangin chhuah tir an ni tih education minister Ratan Lal Nath chuan a sawi. Hri kai enkawl dam tawh hi mi 165 an awm tawh a ni.

Meghalaya-ah nimin khan Chennai aṭanga haw mi pakhat chuan Covid-19 a kai tih hmuh chhuah a ni. Kar liam ta Thawhlehni khan Chennai aṭanga haw vek mi pakhatin hri hi a kai tih hmuh a lo ni tawh bawk. 

Meghalaya state-ah hian hri kai hmuh tawh zat hi mi 15 niin an zinga pakhatin a thihpui tawh a ni. Chennai aṭanga haw, hri kai hmuh thar mi pahnihte tih loh hri kai hmuh tawh dangte erawh chu enkawl dam an ni tawh. 

Tripura chief miniser Biplab Kumar Deb chuan hmun danga tangkhangte an haw khawm mek avangin thla hnih chhung chu an state tan fimkhur a ngaih zual hun a ni dawn a ni, a ti. 

CM chuan Tripura mi, ram chhung hmun dang leh ram pawn aṭanga haw tur hi mi 50,000 chuang an awm tih sawiin, heng mite hi thla hnih chhung hian an haw khawm hman dawn niin a sawi. Hmun dang aṭanga haw an pun chhoh zel avangin hri darh tur venna kawngah theihtawpa fimkhur turin mipuite a chah a, sorkarin dan a siamte ṭha taka zawm turin a ngen nghal bawk. Dan bawhchhia an hriatte pawh thuneitute hriattir zel turin a ti a ni.  

Education minister Narendra Kumar Pradhan chuan zirna inte hawn ni mah se khuahkhirhna erawh siam tel a ni dawn tih a sawi. KG aṭanga class 8 chu an la kal dawn lo a, high school chin chauh an las kal dawn a ni. School-ah hian morning assembly neih ṭhin pawh chhunzawm phal a ni rih dawn lo a, a theih angin social distancing dan kenkawh a ni ang. 

Inrinni-ah school chawlh a awm tawh dawn lo a, final exam chu nakkum February thla­ah neih a ni ang. College-ah chuan dan pang­ngai angin class hi neih chhunzawm a ni dawn bawk a ni.