AP Police Deptt. tichangtlung dawn

Arunachal Pradesh Chief Minister Kalikho Pul chuan Thawhlehni khan an state chhunga remna leh muanna a awm theih nan leh venhimna khauh zawk kenkawh a nih theih nan ruahmanna a siam.

CM chuan ruahmanna siam thar atan hian cheng vaibelchhe 40 dah a ni dawn a, police department thuam ṭhat leh tih changtlunna tur a ni ang. Pul hian February ni 19 aṭang khan chief minister hna a chelh tan a, venhimna lam ngaih pawimawh a tum a ni. Pul hi t chief minister hlui Nabam Tuki nen court-ah an inkhing mek a ni.

Sorkar leh police hotute chuan he mi chungchangah hian meeting neiin, sorkar mi pawimawh leh police lam aṭangin DGP, AIGP leh principal secretary finance te an tel. Meeting chuan ram chhunga remna leh muanna a awm theih nan cheng 43,58,91,615 a ruahman ta a ni.

Sum ruahman hmang hian ralthuam, hmanrua leh lirthei 188 lei a ni dawn. Police Department chu Technology lamah tih hmasawn a nih theih nan hma lak a ni dawn bawk a, hei hian inter-state check gate ah awlsam zawkin motor number, registration leh motorin bungrua a phur rih zawng te awlsam taka hriat theih a nih dawn bakah a phurh theih zat aia rit phur motor te a hre zung zung thei dawn a ni.

Police deparment-a hnaruak 2022 hnawhkhat turin advertisement pawh tih chhuah vat an tum thu Pul chuan a sawi.

Heng bakah hian Banderdewa-ah fire brigade din thuai a ni dawn a, hei hi kangmei chhuak thin laka mipuite himna tura hmalakna peng pakhat a ni. Pul chuan finance deparment chu cheng nuai 10 ṭheuh DC leh SP te hnenah a ṭul anga hman atana pe turin a hriattir bawk.