Pul kaihhruai Congress MLA-te PPA ah inchhunglut

Arunachal Pradesh Chief Minister thar, Kalikho Pul-a thlawptu Congress MLA hel 29 te chu regional party, People's Party of Arunachal (PPA) ah an inchhung lut

Kalikho Pul chuan PPA nena a in-chhunfin thu hi chanchin thar lakhawm-tute a hrilh a, national party dang zawng aia hna an thawh ṭhat tur thu a sawi bawk. Pul chuan Congress MLA dang pahnih pawh an lamah an tel tawh thu sawiin, a kaihhruai sorkar chu pawn lam aṭangin BJP MLA 11 leh independent MLA pahnihin phut let nei loin an thlawp bawk a ni, a ti.

Arunachal Pradesh state-a Congress party buaina chungchangah central lama an party hotute, Ghulam Navi, Kamal Nath, Narayansamy, Salman Khurshid leh Rahul Gandhi-te pawh an hmu tawh a, mahse an buaina chinfel theih a nih loh avangin PPA-a inchhunglut tura thutlukna chu an siam a ngai ta niin Pul chuan a sawi.

Pul kaihhruai MLA-te PPA-a an inchhunluh hi Assembly Speaker leh Assembly Secretariat-a official-te hriatpuina hnuaiah neih a ni.

Congress MLA helte PPA-a a in-chhunluh tak avang hian Congress party chuan Assembly-ah member 15 chauh a nei tawh a, BJP in member 11 leh independent MLA pahnih an awm bawk.