Assam state inthlang dawn hnai

Assam sorkar chu inthlan hmachhawn turin a inbuasaih mek a, inthlan thawm a ring sawt hle.

Inthlan tura an inbuatsaih mek laiin sawizui hlawh thil thei tam tak a awm. Chung zingah chuan Additional Chief Secretary to Chief Minister MGVK Bhanu an inthlan laia Home leh Political department charge la tur puan a nih chungchang pawh a tel. Hei hi Election Commision of India dankalh a nih thu ṭhenkhat chuan an sawi a, commissioner, secretary emaw additional chief secretary chu inthlan laia Home and Political department charge la tura ruat theih an ni lo tih an sawi.

Hetih lai hian Assam Chief Minister Tarun Gogoi chuan Thawhlehni khan Additional Chief Secretary MGVK Bhanu chu Home leh Political department charge la turin a ruat a, hei hi mi tam tak chuan duh loin an sawisel mek a ni.

Kumin Assam state election-ah hian polling station 24,888 a awm dawn a, Chung zinga polling station 608 chu kum 2014 Lok Sabha hnua siam thar te an ni. Cachar district chu polling station thar ngah ber a ni a, kum 2011 state election khan polling station 23,853 a awm a ni.

Assam State election lo awm turah hian Bharatiya Janata Party (BJP) leh Asom Gana Parishad (AGP) te chuan an thawhho tur thu an tichiang tawh. New Delhi-a Bharatiya Janata Party president Amit Shah chenna inah party pahnih hruaitu te chuan inbiakna an nei a, thawhdun an remti ta a ni. He hunah hian AGP lam atangin party president Atul Bora, Prafulla Mahanta, Biren Baishya, Kumar Dipak Das leh mi pawimawh dang te bakah BJP lam atangin Sarbananda Sonowal leh Himanta Biswa Sarma te an tel a ni.

Seat insem dan tur an la tifel lo thung a, a landa-ah chuan AGP te hian assembly constituency 126 zinga 40-ah din an inbeisei a, nimahsela BJP lam hian seat 20 aia tam an pe phal dawnlo niin a lang. Seat insem chungchang hi party pahnih te hian an la sawiho leh dawn a ni.