Greenfield airport hman theihin peihfel dawn

Union Minister Jitendra Singh chuan Sikkim-a 'Green-field Airport' chu nakuma hman ṭan theih tura peihfel a nih tur thu a sawi.

Pakyong-a airport siam nan hian cheng vaibelchhe 605.59 ruahman a ni a, kum 2017 khian hawn hman tum a ni.

Minister Jitendra Singh hian ni thum chamin Sikkim a tlawh a, Ministry of Development of North Eastern Region (DoNER) leh North Eastern Council (NEC) ten hmarchhak hmasawnna project hrang hrang an kalpui te an thlir ho a ni.

Jitendra Singh chuan Sevoke-Rangpo inkar rel kawng km 45 a thui siamna tur cheng vaibelchhe 4,190 ruahman a nih thu a sawi bawk. He rel kawngah hian tunnel 14 siam a nih dawn bakah, lei 28 dawh a ni ang. Zin mite hip thei turin mawi taka chei a ni ang a, Kanchenjunga tlang leh a chhehvel bakah Teesta lui leh a kam vel zau tak chu he rel kawng aṭang hian a lang thei dawn a ni.

Union Minister chuan DoNER Ministry hnuaiah “Non Lapsable Central Pool of Resources” (NLCPR) sum hmangin Sikkim-ah project 183 zawh a ni tawh a, he mi atan hian cheng vaibelchhe 487.91 hman a ni tih a sawi. Tunah hian project 41 dang siam leh mek a ni a, heta tan hian cheng vaibelchhe 721.89 ruahman a nih thu Jitendra Singh chuan a sawi bawk.

North Eastern Council (NEC) hmalaknain cheng vaibelchhe 321.33 senna tur project 54 Sikkim-ah hian ruahman leh mek a ni a, vaibelche 218.54 chu pek chhuah tawh a ni nghe nghe. Minister chuan Sikkim chu state tereuhte ni mah se hmasawn chak tak a ni thu a sawi a, hei hi 11th Five Year Plan ah chiang takin a lang a ni, a ti. Chhinchhiah dan chuan Sikkim State hmasawnna chu za zela 22.8 laiin a ang a, he hi India ramah pawh a sang ber pawl a ni.