AGP ten candidate tur puang dawn

Asom Gana Parishad (AGP) President Atul Bora chuan Assam State election lo awm tura an party candidate turte chu March ni 9-ah puan a nih tur thu a sawi.

State assembly inthlan lo awm turah hian Asom Gana Parishad (AGP) leh Bharatiya Janata Party (BJP) te chuan an thawhho tur thu an puang tawh a, seat insem chungchang erawh tihfel a la ni lo. Bora chuan BJP nena thawhdun duh lo party mi leh sa tam tak an awm tih sawiin, thil ṭha ber tur nia kan hriat avangin he thulukna hi kan siam ta zawk a ni, a ti. Hei hi party mi mai nilo, state mipuite tan pawh thil ṭha zawk tur a nih thu a sawi bawk. Hetihlai hian party mi ṭhenkhat chuan BJP nena thawhho duh loh lantir nan hian Ambari-a party office kawtah an lo pungkhawm tawh an i.

Bora chuan," Assam-ah hian Congress party ni lo sorkarna siam kan tum mek a, mipui te chu thawhho pui atan ka sawm che u a ni. BJP te nen hian kan inkar a ṭha em em a, sorkarna pawh kan chan theih ngei kan ring a ni" a ti. Kalaigaon constituency leh Biswanath constituency-ah te candidate an neih a rin thu a sawi tel zauh bawk.

Hetih lai hian Congress party chuan Bodoland Territorial Area Districts (BTAD) bialah United People’s Party (UPP) nen an thawhho tur thu an puang ve bawk. He lai bial hi BJP ṭhatna hmun a ni a, hneh ngei tumin Congress party lam chuan hma an la mek a ni. Bodoland Territorial Area-a cheng hnam hrang hrangte tana social justice a awm theih nan theih tawp an chhuah tur thu Assam Pradesh Congress Committee President Anjan Dutta chuan a sawi. Mahse BTAD-a bial pali Kokrajhar West, Kokrajhar East, Sidli leh Chapaguri-ah te Congress hian din an tum lo thung.

Heng bakah hian constituency pakua Gossaigaon, Barama, Tamulpur, Paneri, Bijni, Mazbat, Dhekiajuli, Udalguri, and Kaliagaon. “Bongaingaon, Gauripur, Sarbhog leh Bhabanipur-ah te an chuh dawn leh dawn loh an la tichiang lo a, ni rei lo teah tih chian a ni ang tiin Dutta chuan a sawi.

Congress hian helai biala thawh-pui tur hi an la melh reng a, tunah hian AGP, BJP leh AIUDF hruaitute nen inbiakna an nei mek thu Dutta chuan a sawi. Anni bakah hian All Koch Rajbongshi Students’ Union President Biswajit Roy nen pawh inbiakna a nei tih a sawi bawk. United People’s Party (UPP) president U G Brahma pawhin, UPP chuan Bodoland bialah hian eirukna chu an do zel dawn tih sawii, Assam cheif minister Tarun Gogoi-an an bial tana hma a laknaah lawmthu a sawi bawk.