Jorhat School Inspector hrem a ni

Assam Education department chuan answer-script 12,000 hal a nih chungchangah Jorhat Inspec-tor of School, Hiren Gogoi chu suspend a nih thu an tarlang. He thil hi karkal ta Zirtawpni a thil thleng kha a ni a, he thil thleng a vang hian School Inspector chu Pathianni khan suspend a ni ta a ni.

Board of Secondary Education, Assam (SEBA) chuan nimin khan thuchhuah siamin, pawl 10 zirlai te exam answer paper 12,587 chu hal ral a nih thu an tarlang a, heng zinga 5,035 chu Bongaigaon district a mi a nih thu an sawi. Hei bakah hian Dima Hasao (819), Cachar (1,116), Dhubri (1,323), Kamrup Metro (533), Goalpara (789), Kamrup (1,390) leh Karbi Anglong (564) a mi te halral an ni bawk.

Zirlaite tan hian March thla chhungin exam chu buatsaih ṭhat leh tur a nih thu an sawi a, a ni tur erawh tarlan a la ni lo. Zirlaite chu an tih ṭhatna subject-a an mark hmuh chu rin phal sak an ni bawk ang. Answer paper zawng zawng hi hal vek a ni lo a, subject ṭhenkhat te chauh hal a ni. Criminal Investigation Department (CID) chuan he thil thleng hi an chhui chiang mek a, Education Minister pawh thu zawh fiah a tur a ni.

SSP Dr N Rajamarthandan kaihhruai CID te hian school head-mistress leh staff te chu thu zawh fiah an ni tih an sawi a, fingerprint te laiin, hmanraw ṭhenkhat te en dik tura lak a ni bawk.