PA Sangma vuinaah tel tam

Meghalaya politician ropui leh chief minister hlui ni bawk Purno Agitok Sangma chu Thawhṭanni khan state sorkar chuan ropui takin a vui liam a, a vuinaah hian amah uitu leh ngaisangtu mi 15,000 chuang zet an tel.

PA Sangma hi Me­gha­laya leh hmarchhhak mai nilo India ram pum huap pawha mi thil tithei leh mite hriat hlawh tak a ni. A bikin hmarchhakin hma a sawn theih nan a thawh hlawk a, mite ngaih­san pawh a hlawh hle a, “King of the Garos” ti te hialin a hming an sawi thin.

Meghalaya Speaker AT Mondal, Chief Minister Mukul Sangma, cabinet minister leh parliamentary secretary te, Nagaland Speaker Chotisuh Sazo, Nagaland chief minister leh Lok Sabha MP hlui Neiphiu Rio, minister hlui Netam, Donkupar Roy, Meghalaya chief minister hlui DD Lapang leh Manipur chief minis­ter hlui Radhabinod Koijam te pawh Sangma vuina-ah hian an tel a ni. Meghalaya Governor V Shangumunathan aiawhin ADC Trideep Sangma chuan zahna pangpar a dah bakah Assam Governor PB Acharya aiawhin Shillong Lok Sabha MP Vincent Pala pawhin zahna pangpar a dah bawk.

Sangma vuina hun hi darkar thum vel hman a ni. Mukul Sangma chuan, PA Sangma thusawi hriat tur awm tawh dawnlo mah se a sulhnu tam tak hian thu a sawi zui reng tawh dawn a ni, a ti. Sangma chu ṭha­lai kum naupang zawkte politics-a fuihphurtu leh chona thar petu a ni, a ti bawk.

Neophiu Rio pawhin, Sangma chu a thawk tawp ber thlengin hmarchhak tan a ngaihtuahna a seng a, hmarchhak mipui bakah a bikin Tribal te nep bik lo zia pho chhuaktu a ni, a ti. A kalsan tak a chhungte chu Sangma-an a thawh zawh lo tam tak thawk turin pen chhuak turin a ngen bawk.

PA Sangma fanu, Aga­tha Sangma chuan Garo Hills mipuite chung­ah lawm thu a sawi bakah India President, Prime Minister leh politician amah uitu hmun hrang hranga mite chungah lawmthu a sawi.