Imphal-Tamenglong inkalpawhna kawngpui siam dawn

Manipur Chief Minister O Ibobi chuan Thawhṭanni khan Imphal - Tamenglong inkalpawhna tur kawngpui, Kangchup kaltlanga siamna tur project a hawng.

He kawngpui hi km 103 a thui a ni dawn a, a senso zawng zawng za-a 90 chu sorkar laipui tum tur a ni dawn a, state sorkar chuan za-a 10 a tum ve dawn a ni. Project thawhna tur sum hi Asian Development Bank (ADB) aṭangin loan-a lak tur a ni.

Imphal-Tamenglong inkal-pawhna kawngpui siamna atan hian cheng vaibelchhe 1114.18 ruahman a ni a, hei hian ram neitute hnena pek tur zángnadawmmna a huam lo ang. Road Connectivity Improvement Programme of South Asia Sub-regional Economic Corporation (SASEC) hnuai-ah world class standard -a siam tur a ni. Kawngpui siam hna hi Hindustan Construction Company Limited leh Vensar Construction Company Limited ten an thawk dawn a, kum thum leh a chan ve chhunga siam zawh hman tur a ni.

Hetih lai hian Manipur sorkar leh Ministry of Road Transport and Highways (MoRTH) te chuan Tamenglong - Mahur (Haflong) inkalpawhna tur motor kawngpui siam turin hmalakna an kalpui leh mek bawk. Hemi atan hian sorkar laipui chuan Asian Development Bank (ADB) aṭangin sum a puk leh dawn a ni. Tamenglong - Mahur (Haflong) hian East-West Expressway a pawh ang a, India, ASEAN leh Bangladesh-te thlunzawmtu pawimawh tak a ni dawn a ni. Heng bakah hian PMGSY hnuaiah state sorkar chuan a bikin tlang ramah kawngpui engemaw zat siam tumin hma a la mek bawk tih Chief Minister O Ibobi chuan a sawi a, inkalpawhna kawngpui chu hmasawnna bulpui ber a nih thu a sawi.

CM chuan Communication leh transportation ṭha chuan ram chhungah hmasawnna a thlen mek thu sawiin, state GSDP pawh za zela 3.5-in a ṭhang a ni, a ti. Hei hi hriain ADB lam pawhin infrastructure tih changtlun zel nan sum puk a uilo niin Ibobi chuan a sawi bawk.

Imphal-Kangchup-Tamenglong kawng kawng siam zawh a nih hunah chuan mipuiten an ṭangkaipui tur thu Manipur CM chuan a sawi a, uluk taka kawngpui siam hna hi thla tin endika nih tur thu leh hnathawh tihkhawtlai a awm loh tur thu a sawi.

Flag-off function-ah hian Public Work Deparmemnt Minister Dr Kh Ratankumar, IFC Minister Ngamthang Haokip, Hill Areas Committee Chairman Dr Chaltonlien Amo, MLA Janghemlung Pamei, MLA B Brajabidhu, Sadar Hills ADC Members, PWD Chief Engineer leh mi pawimawh engmaw zat an tel a ni.