Garo Hills-ah beihpui thlak chhunzawm dawn

Meghalaya Police te chuan Garo Hills-a Durama Range-ah hel dapchhuah beihpui an thlak leh dawn tih an sawi.

Durama ramngaw velah hian hel pawlin hmun eng emaw zatah bu an khuar a, heng mite dapchhuah hna hi Meghalaya Police te chuan an thawk mek a ni. Helai biala beihpui thlak mekah hian Meghalaya sorkar chuan police a thawn belh leh tawh a ni.

Police te hian helai bialah hian Garo National Limberation Army (GNLA) camp engemaw zat an luhchhuah tawh a,IED 70 leh puak thei thil 1475 an man bakah bomb siamna hmanrua engemaw zat an man tawh a ni. He bialah hian February ni 24 aṭang khan police te hian beihpui hi an thlak tawh a, school-a bomb kam te pawh a puah hmaiin an lo sut tawh a, tunah hian police te hian district panga an tuam leh mek a ni.

South Garo Hills-ah hian GNLA hruaitu Rupanto Toding, Dy CinC leh a pawl te, ASAK hruaitu ṭhenkhatte chu he bialah hian an tawm mek niin Police te chuan an sawi. Tlan chhuah theihna hmun nia an hriatte dangin police te hian hual beh an tum mek a ni. Helai vel ram hi a la ngaw ṭhat em avangin hmalakna hi a chak lutuk thei lo.

Hetih lai hian Central Armed Police Forces (CRPF) company 12 leh CoBRA unit ruk te chu police te pui tur hian an thawk chhuak dawn bawk.