Sadar Hills leh Jiribam ten district puitling beisei

Manipur Chief Minister O Ibobi Singh term thumna a zawh hunah Sadar Hills leh Jiribam te chu district puitlingah hlan kai a ni dawn nia sawi a ni.

Manipur State Cabinet chuan Sadar Hills leh Jiribam te district puitling ni tur hian thutlukna vawi hnih a lo siam tawh a, mahse tun thlengin an la function lo.

Manipur asssemly-in bill pathum a pass duh loh avanga nawrh huaihawttu mi pakua Churachandpur-a thah an nih hnu khan Sadar Hills leh Jiribam te hian district hran neih an ngiat na chu an thar thawh leh ta a ni. Sadar Hills mipuite chuan nasa takin sorkar an kar a, thuneitu ṭhenkhat chu an nihna aṭanga bang turin an ngen hial a ni.

Chief Minister hlui Wahengbam Nipamacha hun lai khan district hi an lo beisei tawh a, tun thlengin an la hlawhtling lo a ni.

Sadar Hills Dis-tricthood Demand Committee te chuan kum 2011 daih tawh khan district pek an nih theih nan hian, Imphal-Dimapur highway chu August ni 1 aṭanga October ni 31 chhung an lo dang tawh bawk.

Sadar Hills-a thu-neitute chuan thuchhuah siamin, sorkar chu April ni 15 ral hma ngeia district puitlingah hlangkai turin an phut. Thu chhuah an siamah chuan, sorkar chu a thutlukna siam tawh bawhzui vat turin an ngen a, tun thlenga tihkhawtlai a ni chu an hriattthiam loh thu an sawi bakah, a tawp thlenga sorkar chu nawr zel an tum thu an sawi. Hetih lai hian sorkar lam chuan District Re-organisation Committee te report siam chu hun rei lote chhungin ennawn an tum thu an sawi ve thung.