BJP leh AIUDF te a rukin an thawk dun : Gogoi

Assam Chief Minister Turun Gogoi chuan State Election lo awm turah Bharatiya Janata Party (BJP) leh All India United Democratic Front (AIUDF) te chuan a rukin inrem-na siamin an thawk dun niin a sawi.

All India United Democratic Front hruaitu Badaruddin Ajmal leh BJP hruaitu Himanta Bishwa Sarmah-te hian a rukin inzawmna an nei niin Gogoi chuan sawi a, he thu hi Thawhlehni khan Rajiv Bhawan-a party dang aṭanga Congress party-a mi 11 te lawmluh inkhawmah a sawi a ni.

Assam-a rorellai, Congress hian an state-a mi langsar tak tak - All Assam Students’ Union president hlui Shankar Prasad Rai, All Koch-Rajbongshi Students’ Union (AKRASU) hruaitu Biswajit Rai, AIUDF hruaitu hlui pahnih, AGP hruaitu leh mi langsar ṭhenkhatte chu Thawhlehni khan an party-ah an lawm lut tih Gogoi chuan a sawi.

BJP hruaitu Narendra Modi chu kum 2014-a Lok Sabha inthlanpui neih dawna a thu tiam anga awm loah Gogoi chuan a puh a, Assam mipuite chu Congress party-ah rinna nghat turin a ngen. BJP thuneihna hnuaiah hmasawnnna hmuh tur a awm loh thu a sawi bawk. Modi sorkar chuan Assam chu special status atangin a paih thu a sawilang bawk.

Assam state election lo awm turah hian party hrang hrang ten thawm an nei ring sawt hle a, sorkarna siam tumin hma an la mek hlawm a ni. Left party lam chuan candidate 59 an neih tur thu an puang tawh a, party thawk ho tur ten an seat chan tur te an siam rem mek a, hmun hrang hrangah ngawrh takin campaign an kalpui mek tawh a ni.

Congress party chuan sorkarna siam leh ngei tumin theihtawp an chhuah a, party dang hruaitu langsar mi enge maw zat an party-ah an lawm lut tawh. Hetih mek lai hian Congress party khing tur hian BJP leh AGD ṭangkawp chuan hma an la ve mek bawk. Ṭangrual party te leh Congress party chu Assam inthlanpui lo awm tura inkhingtawk ber tura ngaih an ni.