Tripura : Ration card aiah smart chip hmang dawn

Tripura food and civil supplies minister Sushanta Chowdhury chuan a constituency chhunga tel sema hun a hmannaah, a department chuan Public Distribution System (PDS) atan ration card hmang tawh loin, smart chip awm card hman a nih theihna atana rawtna an pawm tawh tih a sawi.

"Kawng hrang hranga hmalakna atan hna kan thawk reng a, public distribution system kalpui dan pawh changkang zawka kalpui a nih theih dan tur kan zawng reng a ni. Ṭul hmasa nia kan hriat anga thil kan kalpui tum danah, lehkha hmanga ration card siam aiah smart chip awm card hman chu kan tihhlawhtlin tum hmasak ber a ni," a ti.

Minister hian smart card chu hman nuam leh tlo zawk a nih thu sawi bawkin,"Ration card chu a thler duh bakah tihchhiat a nih theihna a sang em em a, chutih laiin smart card erawh daih rei zawk leh hamṭhatna pawh tam zawk tura ngaih a ni. Harsatna awm thei leh kan tih ngai zawng zawngte chu department lamin kan sawiho a, kalpui dan tur kan pawm vek tawh. A hna thawktu tur zawnna kan buaipui chho ṭan mek a ni a, hman theiha peih thuai a nih ka beisei," tiin a sawi.

Ration semtute pawhin sorkar hmalakna hi an hriat a ṭul tiin, mipuite chu, mi tute'n emaw dodalna leh sawiselna hmangin thu an lo vawrh a nih pawha awih lo turin a chah. "State sorkar chet dan chungchanga thu dik tawk lo vawrh darh ching mi ṭhenkhat hi an awm a, eng ang pawha hmalakna thar leh ṭha kalpui pawh ni se dawt hmanga lo sawi hnawm duh tawk hi an awm ṭhin," a ti.