Kohima diocese golden jubilee lawmna khar

Nagaland-a Kohima diocese chuan an kum 50 tlin lawmna, ni thum chhung an neih chu Pathianni khan Eucharistic procession neiin an khar. Golden jubilee lawmna kharna hunah hian mi sang chuangin ṭawngṭai leh zaiin an Cathedral aṭanga Dzuvuru junction thleng kawng zawhin, South police station lam aṭangin Cathedral-ah hian an let leh a ni.

Procession neih chhung hian Bishop of Bongaigaon, Most Rev. Dr. Thomas Pullopillil chuan sacrament thianghlim a keng a, procession tawpnaah hian Archbishop of Shillong, Most. Rev. Victor Lyndoh chuan thu chah tawi sawiin, Eucharist chu Kristian-te nun kawng dik tur a nihzia leh, Krista entirna a nih thu a sawi. Eucharist chu Krista zuitute hnenah Krista awmzia hrilh nawntu a ni a ti a, mi zawng zawngin hmuin hrethiam lo mah se, Krista, Engkimtitheia chu an zinga cheng reng leh engkim a ruka hretu a nih thu a sawi

Kohima diocese golden jubilee lawmna hi an cathedral-ah Archbishop of Guwahati hoa Holy Eucharist hmanga bul ṭan a ni. Archbishop chuan,"He hun kan lawm chhan chu kan diocese a ṭhang a ni tih entirna a nih avang leh he state-a Catholic mite tana rawng a bawl tawhna zawng zawnga lawmthu sawina a ni. Chanchinṭha pek kan nih avang leh chumi avanga rinna leh nunphung ṭha zawk nei thei kan nih avangin Pathian hnenah lawmthu kan sawi a ni," a ti.