Hmarchhak state pathuma khualzinte khuahkhirhna thlah dul

Union Ministry of Tourism Regional Director in North East chuan tourism chawikan nan khualzinte tana state ramri kana zin theihna, Restricted Area Permits (RAP) leh Protected Area Permits (PAP) neih ngai chu siam ṭhain, khuahkhirhna siamte a thlah dul ṭhen tih a puang.

Foreigner-te tan hian RAP leh PAP lak hi a harsa ṭhin a, India rama North East area, a bikin Arunachal Pradesh, Mizoram leh Nagaland tlawh tur tan neih ngei ngai a ni. Union Minister, Anil Oraw chuan,"Tunah chuan ram dang aṭanga khualzin, a duh apiangin heng state-te hi tour mumal tak siamin an tlawh thei tawh ang, heng state-ah te hian local tour operator kan nei vek tawh a ni," tiin, local tour operator-te chuan an state tlawh tura buaipui ngai zawng zawng an lo buaipui ang a, khualzinte hian a hma lamin permit an dil erawh a ngai dawn a ni, a ti. India sorkar hian ramri, a bikin China leh Myanmar vela tourism chawikan nan hian hmalakna neih belh zel a tum a ni tiin a sawi bawk.

Oraw chuan tourism chawi kan nan bakah hian RAP leh PAP thlah dulna an siam chu khualzinte'n an tlawh ṭhin state-a a khaw mite tana eizawnna remchang leh tam zawk siamsakna tur a nih thu sawiin, Arunachal Pradesh-a India leilungin ni a hmuh hmasak berna hmun an tih, Kibithu khuate pawh a sawi lang bawk. Minister hian North East-in khualzin dawng tur leh hip tura theihna sang tak a neih chu sawi langin, Vietnamese airline te pawh North East-a thlawhtheihna sevice-tir turin a sawm.