Kum tling lo pawngsual vangin man

Tripura-a Khowai district-a Laxmi Puja hman zanah hmeichhia kum 16 mi chu pawngsual rawn a ni a, complaint theh luh a nih hnuah police-te chuan chhui zui nghalin, thubuai kaihhnawihah hian mi pathum an man a, an zinga pakhat hi a bul tumtu ber niin an sawi.

Teliamura Prasun Kanti Tripura SDPO chuan,"October 28-a Laxmi Puja hman a nih zan khan pawngsual tawktu hi a ṭhiante pathum, hmeichhia pakhat leh mipa pahnih nen an chhuak a, an chenna area-a Laxmi Puja lawmna chhim tura kal an ni. A chhungte in ṭhenkhat pawh tlawh a tum nghe nghe. Khaw dai deuha a ṭhiante in an pan laiin Khitish Debbarma chuan an kawng dangin a lo hau a, Debbarma hian a ṭhiante chu vauin pawngsual tawktu hi kalsan turin a hrilh a ni. A ṭhiante hian an hlauh avangin an tlansan a, helai hmun aṭang hian ruk bo a ni ta a ni," tiin a sawi.

Police-te chuan pawngsual tawktu hi ramhnuai bul hnai, hmun fal laiah hruai a ni a, pawngsualtua puh leh a ṭhiante hian an khawih rawn ta a ni, an ti. Pawngsualtua puh ṭhiante pahnih hi Ajay Debbarma leh Subikash Debbarma nia hriat an ni. Pawngsual tawktu hmeichhia hi a tuk zingah an inah hawin, thil thlen dan a chhungte a hrilh a, complaint siam a nih hnuah pawngsualtua puhte hi Indian Penal Code section 376 A leh D bakah, POCSO Act hnuaia section 6 hmangtea man an ni.