Nagaland sorkarin Covid-19 dona atan Cheng vaibelchhe 139 a seng tawh

Nagaland sorkar chuan an state chhunga hripui leng mek, Covid-19 dona atan cheng vaibel­chhe 139 hman a ni tawh tih a sawi a, sum senral zinga cheng vaibelchhe 112 hi sorkar sum a ni. 

Chief minister Neiphiu Rio chuan Ningania 13th Nagaland Legislative Assembly session-ah he thu hi sawiin, "State sorkar chuan sum tam tak a ba a, sum lakluhna pawh kan nei ṭha lo hle. Mahse hei hian hri leng dona atana kan hmalaknate a dan phah lo a, mipuite himna turin a ṭul angin hma kan la zel dawn a ni," a ti. 

Finance ministry changtu ni bawk, Rio hian medical infrastructure tihchangtlunna tur te, hri leng dona kawnga hmanrua leh mamawh leina atan state sorkar chuan cheng vaibelchhe 62 a seng tawh a ni, a ti. Sorkar laipui leh hmun dang aṭanga puihna an dawn chu cheng vaibelchhe 10 vel chauh a ni tiin, a bak cheng vaibelchhe 52 chu state sum a nih thu a sawi. 

Hri leng avanga tangkhangte chhawmdawlna atan te, ei leh in a thlawna semna atan te, qua­rantine centre buatsaihna leh enkawlna atan te, state danga tangkhangte hruai hawna atan leh ṭul dang atan cheng vaibelchhe 74 sen a ni bawk. Hemi atana sorkar laipui puihna an dawn chu cheng vaibelchhe 14 chauh a nih thu CM chuan a sawi bawk. 

State sorkarin medical leh non-medical thil atana a sum sen hi a vaiin Rs vbc 139 a ni a, heng zinga Rs vbc 3.35 chu Chief Minister's Relief Fund (CMRF) aṭangin a ni. 

Rio chuan hri leng vanga sorkarin sum lama harsatna a tawhte tihziaawmna turin non-essential expenditure 15% a tihhniam a nih thu leh, diesel leh petrol-ah Covid chhiah lak belh a nih thu a sawi. Hengte hi mipuite tana ṭha tura ngaiha an tih vek a nih thu a sawi bawk. 

Hri kai pung belh zel mah se mipuite chu chiai lo tur leh, hri kaite thinhrik lo turin a chah. Hri dona kawnga a hma tawngtu, chhun leh zana rim taka thawkte chu theihtawpa thlawp turin a ngen a,hri darh tur venna atana sorkarin kaihhruaina a siamte zawm a, fimkhur taka awm chhun­zawm zel turin CM chuan mipuite a ngen.