Meghalaya : Ṭhalaite tana hmasawnna ruhrel din nan ram pe
New Shillong Township Development Agency chuan National Law University, Meghalaya leh Meghalaya State Judicial Academy te campus sakna atan Thawhṭanni khan ram an pe. Ram pek inhlan chhawnna hun hi chief minister Conrad K. Sangma chuan hmangin, Meghalaya High Court chief justice, Sanjib Banerjee hnenah a hlan a, Sanjib Banerjee hi National Law University, Meghalaya Chancellor a ni bawk.
CM Sangma chuan sorkar chu a thil tumah a chian thu sawiin, economy thiar zawh theih aṭanga mahni intungnung thei economy din an tum thu a sawi a, chu economy chu mihring thaa innghat a nih thu leh, an state hmakhua atana mihring ṭha zawk chher chhuah chu an tum a nih thu a sawi. "India hi ram naupang tak a ni a, ṭhalai zawng zawng hian ram hmasawn nana tha an thawh a ṭul a ni. Ṭhalaite'n tha an thawh theihna atan hian hun leh hmun remchang siamsak hi a ṭul. Sorkar hian chumi hlawhtlin nan chuan higher leh professional course atan hmasawnna ruhrel din hi a tum a ni," a ti.
Sangma chuan zirna leh thiam thil zirna in zawng zawngte chu zirna in satliah pakhat ang chauha kal loin sorkar nen hmasawnna tur an ngaihtuah dun a ṭul thute a sawi a, zirlaite chu research, analysis leh documentation te hmanga sorkar mamawh thil chi hrang hranga tha thawh turin a sawm.
He hunah hian chief justice Sanjib Banerjee pawhin thu sawiin, university chu textbook zirnaa innghat mai loin thiamna tluantling leh thil thar hmuh chhuah kawnga hmalak a tum thu a sawi a, state chhung mite'n an state university-a zir tura rilru an siam tam leh zual a beisei thu a sawi bawk. National Law University, Meghalaya chuan khawvel hmuha pho chhuah tur theihna a nei tiin, hmasawnna kawng a zawhnaah state mite chuan theihtawp chhuahpui se a duh thu a sawi a ni.