Bru-te hnena thla tin ṭanpuina pek ṭhin titawp

Bru raltlan, inremna neih anga Tripura hmun hrang hranga dah, mi 6,000 chuangte chuan thla tina ṭanpuina pek an nih ṭhin Rs. 5,000 chu tihtawp a nih avangin harsatna an tawk tih an sawi.

Bru hruaitu, Bruno Msha chuan awmna an pek chhungkaw thar tam takte chuan a chhan hriat lohin ṭanpuina hi an dawng lo tih sawiin,"Ṭanpuina sum pek kan nih ṭhin tihtawp a nih chhan hi state sorkar mi leh sa tu mahin min hrilh thei lo a ni. A chhan zawh fiah tuma kan kal apiangin Bru-te tana ṭanpuina sum chu sorkar laipuiin a pek chhuah a nih thu min hrilh a, sum pek chhuahnaah state sorkar a inrawlh lo niin an sawi. Heng harsatna kan tawhte hi chinfel thuai a nih ka beisei," tiin a sawi. Bruno hian inremna ziah a nih danah thla tina ṭanpuina Rs. 5,000 dawng tur an nih piah lamah hian ram pek te, in sakna tur Rs. nuai 1.5 pek te, Tripura hmun danga sawn chhuah chhungkaw 6,308 te tana fixed deposit-a Rs nuai 4 dahsak te a tel thu a sawi. "Tripura-a awmna tur pek chhungkua hi 6,959 an tling tawh a, heng zinga chhungkaw 651 te hi relief camp-ah an awm. A bak zawng chu state sorkarin an awmna tura a buatsaih hmunahte dah an ni tawh hlawm a ni," a ti.

Bru ṭanpuina sum hi ṭhenkhatin thla ruk an dawn tawh laiin ṭhenkhat chuan thla thum chauh an dawng a, ṭhenkhat erawh chuan nikum chhung zawng khan an dawng lo thung. West Kalajhari hills-a cheng Bru chhungkuate chuan thla ruk chhung ṭanpuina hi an dawng tawh lo a ni. Dhali district-a Bru hruaitu, Karanjoy Reang chuan district magistrate, Siddhartha Shiv Jaiswal hnenah lehkha thawnin, ṭanpuina sum tawp avanga harsatna an tawh thu a hrilh a, lehkha thawna a tarlan danin nikum October 2022 aṭanga fund chu an dawn tawh loh thu leh chhunzawm a la nih loh thu a tarlang. Reang chuan ṭanpuina sum chu pe chhuak leh thuai turin a ngen a, inremna anga an bank account-a kum hnih chhung pek chhunzawm an nih leh theih a beisei thu a sawi.