Manipur : Tribal body-in non-tribal NGO thlawpah sorkar puh

Manipur-a tribal pawl, Indigenous Tribal Leaders Forum (ITLF) chuan Manipur-a BJP kaihhruai sorkar chu non-tribal organisation, Meitei NGO-te chu Ministry of Tribal Affairs aṭanga funding an hmuh theih nana thlawpah an puh.

ITLF Media & Publicity, Gina Vualzong chuan Thawhṭanni khan hemi chungchangah hian thuchhuah siamin, chief minister N. Biren Singh chuan union minister of tribal affairs, Arjun Munda hnenah proposal theh lutin, tribal tihhmasawnna tur tih chhuanlama hmanga funding dilah a puh a ni. He rawtna theh luh, state sorkar pawhin a pawmpuiah hian Meitei NGO-te chu tribal district leh area hrang hrangah hmasawnna hna thawka sawiin NGO paruk Detailed Project Report pawh dah tel a ni, a ti. Mahse Manipur Khadi and Village Industries Board vice chairman, Wahengbam Dineshchandra Singh lehkhaah chuan, project thawk tura rawt NGO parukte chu tribal pawl leh, hill district-a mite an ni lo tih a tarlang.

Vualzong chuan Meitei NGO-te'n sorkar laipui aṭanga project fund an hmuh theihna atan tribal community chu chhuanlamah an hmang a, an fund-te hi anmahni pualin an pawtpeng ngei dawn niin a sawi bawk. Union Minister hnena tribal project atana sum dil hi Rs. vbc 3 chuang a ni.

Police-te man Myanmar hel tih hriat chhuah a ni

Manipur police-te'n nikum August thlaa an lo man tawh, Mya Kyay Mon chu October 23 khan Imphal bazarah man leh a ni. Myanmar hel pawl mi leh sa a ni tih hriat chhuah a ni.

Mya Kyay Mon hian Norwegian passport leh Indian e-visa expired tawh a nei a, document thi tawh nei chunga India-a a la awm reng theih dan chu chhui zui a ni dawn bawk. Manipur sorkar-in foreigner detention centre-ah dah tura a tih angin police hotute leh jail superintendent-te chuan detention centre-ah hian an dah rih a ni.

Mya Kyay Mon hi October 23 khan Imphal-a bazarah hmuh a ni a, nikum August thla khan Assam Rifles-te'n Imphal leh Moreh inkar highway-ah Norwegian passport leh Indian e-visa expired tawh kawlin an man a, kumin February thla khan bail-a chhuah a nih hnuah home-ah dah niin, May thlaa tualchhung buaina chhuak avang khan Manipur aṭanga thawn chhuah a lo ni tawh a ni. Police-te chuan Manipur-a hmuh a nih chhan hi an chhui zui mek.