Sikkim-ah Alkem Pharma-a thawk 142 in hri kai

Sikkim chhim lam, Samardung hmuna Alkem Pharmaceutical Company-a thawk zinga mi 142 in Covid-19 an kai tih  nimin khan hriat a ni a, ni khata state chhunga hri kai hmuh chhuah tam ber ni a ni. 

He company-a hian a  hmain thawktu zinga 18 in hri an kai tih hriat a lo ni tawh a, Namchi District Hospital leh STNM Hospital-ah dah an ni. 

Alkem Pharmaceutical Company-ah hian thawktu 2,500 vel an awm a, lockdown kalpui a nih avangin thawktu tam zawk chu chawlin, mi 300-400 velin hna hi an thawk chhunzawm a ni. Hri kai hmuh chhuah an awm tirh aṭangin factory hi khar nghal a ni. Thawktu zinga 292 chu factory compound chhunga guest house-ah khung hran mek an ni. Sikkim-a Covid-19 kai hmuh chhuah tawh hi mi 1,076 an tling tawh. An zingah 581 chu enkawl dam ni tawhin, enkawl mek 494 an awm.