Manipur-ah firfiakin police officer kap hlum

Manipur-a ramri khua, Moreh-ah Manipur state police leh Border Security Force te'n helipad siamna tur atana school pakhat ground an buatsaih en dika kal, SDPO, Chingtham Anand Kumar chu firfiak nia hriatte'n an kap hlum.

Police officer thah a nih avang hian Manipur cabinet chuan emergency meeting neiin thuchhuah an siam a,"Manipur tualchhung buaina avanga hnam pahnihte inkara inbeihna thlengin ziaawm lam a pan a, boruak a ralmuan chhoh mek laia Kuki firfiak ni ngeia hriatte'n Manipur police officer an kap hlum hi kan dem a ni," tiin an tarlang. Cabinet hian firfiakte kah hlum police officer chhungte zinga pakhat tan sorkar hna pek an tum bakah, Rs. nuai 50 an pek tur thu an puang nghal bawk. Moreh leh a chhehvela firfiak dap hna thawk turin sipai a tir chhuak nghal bawk a ni.

Cabinet hian World Kuki-Zo Intellectual Council-in October 24-a thuchhuah an siam tarlang bawkin, November thla ral hmaa indona dang hmachhawn tura an silai leh hmanraw dangte dah ṭha tura infuihna a nih thu an sawi. Hei vang hian World Kuki-Zo Intellectual Council lakah hian FIR an theh lut zui bawk.

World Kuki-Zo Intellectual Council hian Kuki National Army leh hel pawl dangte chuan an indona chu central leh state sorkar nena inremna an neih anga an zawm theih loh thu leh, volunteer an zawn thu an sawi ve thung. Kuki civil society group-te pawhin thuchhuah nei ve bawkin police commando-te'n ambush anga an sawi chu an laka commando te chet dan rawng tak avanga volunteer-te nena an inkahna a nih thu an sawi a, Kuki pawlte hian Manipur sorkar chu Moreh khuaa mipuite tiduhdah tura force mi tirh luh belhah puhin, police te la chhuak turin sorkar laipui an ngen.

Moreh-ah hian Manipur commando-te tirh luh nghal an ni a, Moreh pana Assam Rifles-te nena an kal lai hian firfiakte'n ṭum hnih lo ambush-in, police commando mi pathumin hliam an tuar bawk a ni. Manipur sorkar chuan inkahna a awm leh tak avang hian Manipur-a mobile internet ban chu November 5 thleng a pawtsei chhunzawm leh nghal.