Meghalaya damdawi ina contract-a thawkte hlawh pe loin ban

Meghalaya damdawi in hrang hranga contract-a sorkarin a chhawr, mi 157 te chu an contract renew-sak lo tura thutlukna a siam avangin ban an ni. Heng damdawi ina thawk ban takte hi sorkarin Covid-19 hri len laia a chhawrte niin; emergency worker bakah blood bank-a thawk leh laboratory technician te niin thla ruk chhung hlawk pek an nih loh hnuah ban an ni.

Hnathawk ban takte hian chief minister Conrad K. Sangma hnenah ziaka an harsatna an thlen tawh thu sawiin, hna aṭanga ban an nih chu dah ṭhain, thla ruk hlawh sorkarin a la batsak pe tura an ngenna pawh chhanna pek an la nih loh thu an sawi. An zingah hian Shillong civil hospital-a thawk mi 22 bakah Tura civil-a thawk mi 11 leh Ampati civil-a thawk mi 3 an tel a, a bak zawng hi civil hospital dang leh CHC-a thawkte an ni. Ban zingah hian ICU, OT, dialysis, leh ECG technician te an tel.

Covid-19 hripui len avanga chhawr zingah hian mi sang chuang ban an lo ni tawh a,mahse, a tam zawk erawh Garo-Khasi-Jaintia hills velah chuan chhawr leh an ni. Heng mi 157 te hi September thla khan ban an ni ve leh a, Department of Health Services (DHS) hnenah chhawr chhunzawm turin vawi tam tak ngen mah se department lam hian chhanna an la pe lo. Ban an nih hnu hian civil hospital tam tak leh CHC ṭhenkhat chu buai leh indaihna lo dinhmunah an kir leh tawh niin an sawi bawk. Medical department hnathawk pakhat chuan emergency leh laboratory service inhawng reng thei ṭhin chu thawktu indaih loh avangin darkar 12 chauh an kalpui theih tawh thu sawiin, contract-a thawkte chhawr chhunzawm tura sorkar hnena an ngenna pawh hnawl a nih thu a sawi. Contract-a thawkte ban an nih avang hian hospital hrang hranga senior official-te chuan hna tam tak a khaihlak phah ṭan tawh niin an sawi bawk.