Shillong-a tui in tur a him tawk : PHED Minister

Federation of Khasi Jaintia and Garo People (FKJGP)-in Shillong-a sorkarin tui a sem chu in atan a him lo nia an sawi hnuah, Public Health Engineering Department (PHED) minister, Marcuise Marak chuan Shillong-a tui an pek chhuah chu in atana a him tawk thu a sawi.

August 22 khan FKJGP hian Shillong khawpui hmun hrang hrang 46 aṭangin tui sample an la a, State Food Testing Laboratory Commisionerate of Food Safety, Pasteur Hill-ah test-tirin, hmun 46 zinga hmun 44-a mite tui chu him tawk lo niin an sawi.

Marak chuan Shillong-a tui an pek chhuah ṭhin chu sem a nih hmain ni tin Mawphlang treatment plant-ah test ziah a nih thu a sawi. "PHE-in tui kan pek chhuah hi a thianghlim a, a in theih a, a in tlak a ni. FKJGP-in tui an lak hi engtianga an lak nge kan hre lo a, mahse, mipuite hriata ka sawi duh chu tui in tlak kan pe tih hi a ni. PHE tank te hi a lo bawlhhlawh emaw, a him lo a nih chuan kan en zung zung ṭhin, tun dinhmunah erawh tui kan pek chhuahte hi a thianghlim a ni," a ti.