Manipur-in Patriots' Day hmang
Manipur chuan Ningani khan kum 1891 Anglo-Manipuri war-a an state humhimna atana nunna hlantute hriatrengna ni, Patriots' Day a hmang.
Chief minister N Biren Singh hoin minister leh official-te chuan Hicham Yaichampat, Moirangkhom, Thangal General Temple Complex, Palace Compound, Kangla Uttra, Kangla leh Bir Tikendrajit Park-a Saheed Minar-ahte pangpar an dah a ni. CM chuan an thlahtu, Manipur zalenna leh humhimna atana an nunna hlantute chu an hre reng tih sawiin, ṭhangtharte pawhin an theihnghilh thiang lo a ni, a ti.
Hri kai 4,000 chuang awm
Manipur-ah hian hri lengin zual lam a la pan zel a, hri kai kai hmuh chhuah hi nimin khan mi 4,112 an tling tawh. Ningani khan mi 130 in Covid-19 an kai tih hriat belh leh a ni a, an zingah hian security force mi leh sa 39 awmin, hmun danga zin chhuahna nei lo, tualchhung aṭanga kai mi 87 an tel bawk. Hri kai zinga 2,295 chu enkawl dam ni tawhin, mi 13 in an thihpui tawh thung a. Enkawl mek hi mi 1,804 an la awm a ni.