NSF-in 'One Nation, One Student ID' dodal

Naga Students' Federation (NSF) chuan Nagaland-a Automated Permanent Academic Account Registry (APAAR), ‘One Nation, one student ID’ tia sawi chu kalpui an duh loh thu an sawi.

Nagaland school education department chuan Education Ecosystem Registry, EduLoker tia hriat tihhlawhtlinna atana an hman Automated Permanent Academic Account Registry (APAAR) enchhinna hi a nei mek a ni.

NSF hian chief secretary hnenah lehkha thawnin,"National Educational Technology Forum (NETF)-in an rawt anga Aadhar baka pre-primary aṭanga higher zirlai thlenga identification hran an neihna tur chu APAAR hi a ni. Sorkar hian zirlaite dinhmun leh zirnaa an thlen chinte awlsam taka hriat nan a ṭhat thu sawi mah se, he hmalaknaah hian thil ngaihtuah tel tur tam tak a awm a ni. Mimal data Aadhar nena inzul tak a nih avangin a him leh him loh thute sawi a ni lo. Khawvel huapin data a pawimawh tawh a, inruksakte a hluar laia data lak khawm a nih dan leh dah ṭhat a nih dan hi thui tak sawi a nih si loh avangin a hlauhawm thei a ni," tiin an tarlang. "NSF hian APAAR atana inziak lut tura nu leh pate rawn ringawt chu a tawk lo a, zirlaite privacy leh diknate venhimna pawh ngaihtuah tel a ngai a ni. Sorkar hian sorkar agency-te vek inkarah chauh inhlan chhawn theih a ni ang ti mah se, hei hian data hman sualna tur a veng thei lo," tiin, APAAR hman chuan sikula thuneitute leh zirtirtute indaih lohna awm sa karah harsatna leh hna a siam belh mai mai anga, zirnain a tuar phah thei dawn niin an sawi.

Zirlai pawl hian APAAR chu hman a nih hma leh enchhinna neih chhunzawm zel hmaa ngaihtuahna seng ṭha leh turin sorkar an duh thu an sawi a, a kaihhnawih department-te pawh zir chianna zau zawk leh a nghawng turte uluk taka ngaihtuah hnua kalpui chauh turin an ngen bawk. APAAR enchhin tawhna awmte pawh zir chianna mumal zawk awm hma chu titawp rih tur leh, institution dang, lo la hmang ve lote pawhin tih ngei ngei tur a nih loh avangin lo kalpui rih lo turin an ngen a ni.