Meghalaya : Kum tling lo pawngsualtute kum 14 tang turin hrem

Shillong East Khasi Hills special judge (POCSO), Swapna G Momin chuan kum 2018-a hmeichhe naupang kum 12 mi pawngsuala puh mi pahnihte chu hrehawm taka kum 14 tang turin a hrem.

East Khasi Hills Superintendent of Police (SP), Sylvester Nongtnger-a'n thuchhuah a siamah thiam loh chantirte pahnih, Mortonjune Kharbani leh Lumding Syiemlieh te chungthu hi special judge (POCSO) court-ah October 27, 2023 khan thutlukna siama tihtawp a nih thu a sawi a, thiam loh chantirte hi Rs. 50, 000 ve ve chawi tura tih an nih bakah, hrehawm taka kum 14 chhung tang tura hrem an ni bawk.

SP hian thubuai chungchang a sawinaah December 3, 2018 khan Mawngap Police Station-ah Mortonjune Kharbani-a'n pawl 7 zirlai, hmeichhe naupang kum 12 mi a pawngsual chungchangah FIR an dawn thu leh, 2017 khan hmeichhe naupang hi amaha ina a awm laiin vawi tam tak a pawngsual bawk nia report an dawn thu a sawi. FIR bawhzuia chhui a nih mek laiin hmeichhe naupang hi mi dang, Lumding Syiemlieh tih chuan a pawngsual ve ṭhin tih hriat a ni leh a ni, a ti. An thu dawn leh hriat behchhanin, Mawngap PS-ah IPS section 506 bakah R/W section 5(l)(m)(n) leh section 6 POSCO Act hmangin heng mi pahnihte lakah hian thubuai ziah luh a ni ta a ni.