November 4 aṭangin Mandala festival

Ni hnih awh tur India-Vision Mandala festival chu November 4-ah Arunachal Pradesh-a West Kameng district-a Mandala top-ah hawnna neih a ni dawn. Mandala festival hi music genre hrang hrang hmanga mi hip khawmna tur atana buatsaih a ni a, tuipui aṭanga ft. 10,500- a sangah he hun hi hman a ni dawn a ni.

He festival hi Department of Youth Affairs bultuma Xtreme Himalayas leh Arunachal Organic te ṭangdunin an buatsaih a ni. Festival-ah hian India DJ neih ṭhat ber ber leh khawvel huapa DJ lar, Fred Neuromotor te an tel dawn a, electronic leh live music piah lamah hian helai hmuna hnam leh chi te rimawi pawh entir a ni dawn bawk. Festival hman dan tur hi hlawm lian deuh pahnihah ṭhenin, electronic leh live stage anga ṭhen a ni a, lineup hi electronic, Psy-trance, folk, contemporary leh Bollywood genre te anga ṭhen a ni. Mandala festival-ah hian khualzinte bakah festival hmang tura kal hrim hrimte tana intihhlimna buatsaih a ni ang.

Mon Multipurpose Cooperative Society pawhin Dirang-ah Mandala festival rual hian hun hman ve an tum thu an sawi a, Dirang-ah hian ruihhlo ṭhat lohzia inzirtirna hawia hman tum a ni. Dirang aṭang hian Self-help group leh Sikkim Gyalshing district-a self-help group ṭhenkhat ṭangkawpte'n ei leh in an buatsaih dawn a ni.