Assam sorkarin pawl 12 zirlai tiṭha zualte tan scooter pe dawn

Assam sorkar chuan Dr. Banikanta Kakati Award scheme hnuaiah November 30 hian pawl 12 pass zirlai tiṭha zual mi 35,775 te tan scooter an pe dawn tih an tarlang.

Chief minister Himanta Biswa Sarma kaihhruai Assam cabinet meeting, Guwahati-a neih zawh takah Assam Higher Secondary Education Council (AHSEC) buatsaiha pawl 12 exam-a zirlai tiṭha bikte tana pek a nih tur thu hi an sawi a ni.

Cabinet thutlukna hi Assam tourism minister, Jayanta Malla chuan puangin, scooter semna hun hi November 30-ah neih a nih tur thu a sawi a, AHSEC buatsaih pawl 12 exam-a mark 75% chung lam hmu mipa 5566 leh 60% chung lam hmu hmeichhia 30,209 te chu scooter pek vek an ni dawn niin a tarlang. Heng bakah hian SEBA hnuaia pawl 10 exam-a mark 75% chin chung lam hmu, zirlai 27,183 te chu Anundoram Borooah Award scheme hminga Rs. 15,000 ṭheuh pek an nih tur thu a sawi bawk. Assam state cabinet hian Royal Government of Bhutan tan MBBS seat 3 dah belh an tum thu sawi bawkin, Nalbari Medical college-ah seat pahnih leh FAAMC, Barpeta-ah seat pakhat dah belh a ni dawn a ni.