BJP leh AGP ten candidate tur hming puang

Assam state assembly inthlan lo awm tur atan Asom Gana Parishad (AGP) president Atul Bora chuan Ningani khan an party candidate tur hming 25 a puang. Candidate tur zingah hian Assam chief minister hlui Prafulla Mahanta leh party president Atul Bora te chu hming langsar an ni.

Asom Gana Parishad (AGP) leh Bharatiya Janata Party (BJP) te hi assembly inthlan lo awm turah hian an thawk dun dawn a ni. AGP hian constituency
ṭhenkhata ding tur candidate hming chu a la puang tello a, candidate hming la puan loh zingah hian mi langsar tak tak an awm a, chung zingah chuan Asom Jatiyatabadi Yuba-Chatra Parishad (AJYCP) hruaitu Dilip Patgiri te, IPS officer hlui Dilip Bora leh lemchan thiam Doreen Hazarika te pawh an tel.

Atul Bora chuan thuthar thehdarhtute hma-ah, an party thuneihna sang chuan ngun taka a ngaihtuah hnuah party candidatte tur te hming chu puan a nih thu a sawi. Party president Atul Bora chu Bokakhat bialah a ding dawn a ni. Atul Bora chuan an party chhuahsantute chu Congress sorkar nilo sorkar thar dinpui atan a sawm bawk.

BJP lam pawhin an party candidate tur hming 88 a puang tawh bawk. BJP candidate zingah hian Chief Ministerial candidate Sarbananda Sonowal, Congress hruaitu hlui Himanta Biswa Sarma leh Lok Sabha MP Kamakhya Prasad Tasha te hming chu a langsar zual an ni.

State inthlan lo awm turah hian seat 126 a awm dawn a, chung zinag seat 90 chu BJP te hian an chuh dawn a ni. BJP hian AGP nen an thawhdunna tur Bodoland bial-ah seat 24 an nei dawn a, Bodoland People's Front (BPF) nen ṭangkawpin seat 12 an chuh dawn bawk.