Regional party zingah AIUDF-in sum an dawng hnem ber

Assam state chhunga regional party lian pathum zingah All India United Democratic Front (AIUDF) chu tun hnai kum sawm chhunga pawisa dawng hnem ber a ni.

AIUDF hian kum 2004-2015 chhung khan cheng vaibelchhe 4.24 donation a hmu a, Bodoland People's Front (BPF) chuan dawtin vaibelchhe 2.4 an dawng a, Asom Gana Parishad(AGP) chuan vaibelchhe 1.08 donation atang hian a hmu ve bawk. Election Commission of India chuan party hrang hrang te chu donation aṭanga an sum dawn zat report turin a hriattir a ni.

AIUDF hian Sukhbir Singh Sahani hnen
aṭangin donation cheng nuai 65 a dawn bakah, Ajmal unau chuan cheng nuai thum ve ve an thawh bawk. BPF party chuan Moniram Brahma hnen aṭangin donation cheng nuai 20 a dawng a, Star Cement chuan AGP tan donation cheng nuai 10 thawhin, party tana thawhhnem ber a ni. Association of Democratic Reforms-in a tarlan dan chuan party hrang hrang donation dawn zinga za zela sawm chu a luhna hriat loh a ni. Heng donation te hi party mi leh sa ten an pek leh party-in a mi leh sa te aṭanga khawn a ni tlangpui a, ‘coupon system’ hmang te pawh an awm.

Hetih lai hian National party lian pahnih Congress leh BJP te sum dawn erawh a tam hle thung. Congress chuan kum 2004-2015 chhung khan donation aṭangin cheng vaibelchhe 3,388 a dawng a, BJP chuan vaibelchhe 2,302 donation aṭang hian a hmu ve bawk.

Hmarchhak bikah Congress chuan donation petu mi 222 hnen aṭangin vaibelchhe 5.7 a dawng a, heng zingah hian H Lyngdoh-in nuai 66, Topcem Cement nuai 50 leh Cement Manufacturing Company Limited nuai 30 te chu a pe tam zual an ni. Gadi Agro Pvt Ltd chuan BJP tan nuai 39.9 a pe a, hmarchhak bialah a pe tam ber a ni. Cement Manufacturing Company Limited chuan donation atan hian nuai 10 a pek bakah, SM Corporation chuan nuai nga BJP tan hian a thawh ve bawk.