TIPRA Motha leh NE advisor-te inbe leh dawn

TIPRA Motha founder, Pradyot Kishore Debbarman chuan India sorkar hnuaia North East advisor, AK Mishra chu an thil phut; constitution zulzuia state hran an neih theihna tur chungchang sawiin inbiakna an neihpui leh thuai tur thu a sawi.

An party-in function an neihnaah thu sawiin, Debbarman chuan,"Inbiakna kan neih hmasak zawk khan hnam hrang hrangte hotu bakah Council of Tiprasa Hoda hotu pawh a lo tel a ni. Rei tak sawihona kan nei a, kan duhdan leh beisei zawng zawngte kan hrilh bawk. Inbiakna nei leh tur hian ruahmanna a kal mek a, hnam hrang hrang hotute pawh an lo tel kim leh vek ang," a ti. Hnam ṭhenkhat hruaitute'n an thil phut dodal zawnga an khawsa chu pawi a tih thu sawiin, Debbarman chuan,"Thuneihna leh chanvo duh avanga mi ṭhenkhatin kan hmalakna sawi nep zawnga hma an la hi pawi ka ti hle. Lalu Prasad Yadav leh Mulayam Singha Yadav te hi en ula, Yadav ai an awh a ni. Yogi Adityanath pawh Thakur leh Bhrahmin chhuak a ni a, Prime Minister Narendra Modi pawh entirna langsar ber a ni. A lim hi Gujarat-ah lian taka din hmuh tur a awm a, ram pum huapin an chawimawi a ni. Helaia kan mite zingah erawh kan zavaia ṭhatna tur zawkah pawh a inhnuk hniam zawngin ṭhenkhat hi an khawsa duh tlat a, hei hian ka rilru a tina a ni," a ti.

Debbarman chuan a thil beih chu an thlah lo la awm turte tan a nih thu sawiin," Inthlan result zawhah khan kawng dang daih zawh thei ka ni, mahse, kan hnam hma hun ngaihtuaha beih chhunzawm zel hi ka thlang a, politics-a ka kal dan tur aiin chu chu ka dah pawimawh zawk. Kan ram chungah ngei thu kan neih si loh chuan eng nge sawt ang? Ramri hi hawng ila, kan mite helaia cheng tur hian sawm ang u," tiin a sawi.