Zirlai hruaitu thihna chungchangah police 2 man

Sikkim-a Namchi Government College President ni ṭhin, kum 22 mi, Padam Gurung thihna chungchang chhuitu, judicial inquiry committee chuan tui tla (Asphyxia) avanga thi a nih thu an tarlang. Gurung hi kumin June 27 khan ft.2-a thuk kawrah tlain hemi hnu hian a thi zui a, Namchi khaw mipuite chuan a thih dan chu awih loin nawrh an lo huaihawt tawh a ni.

Padam Gurung thihna chhui tur hian Sikkim sorkar chuan one-man judicial inquiry dinin, Sikkim High Court chief justice NK Jain chu ruat a ni a, Nilaini khan chief minister Prem Singh Golay hnenah a report buatsaih a theh lut a ni. Hemi hnu hian Sikkim chief secretary, VB Pathak leh Sikkim Police DGP, AK Singh te chuan chhui chianna report hi puangzarin, report-a an hmuh behchhanin Sikkim Police official pahnih; Namchi Police Station, Station House Officer Dawa Lhamu Pakhrin leh Gurung thihna chhui hmasatu Sub Inspector Siddharth Subba te chu man an nih thu an tarlang. Anni pahnih bakah hian Gurung-a thih hun laia Namchi district Superintendent of Police, Manish Kumar Verma chu a hna a hlen ṭhat tawk loh avangin show cause notice pek a ni bawk.

DGP AK Singh chuan,"Heng mite hremna lekkawh tur hian Sikkim police chuan inquiry officer a ruat ang. Hnu chhui kawngah an muangchan luih avang leh thil thlenna hmun a hun taka an thlen loh avangin hrem tur an ni. Padam Gurung thihna erawh police-te duty ṭhat loh vang a ni lo a, mahni intihlum pawh ni loin, tawhsual tawk a ni tih post-mortem aṭangin kan hre thei a ni," a ti.

Inquiry report-a tarlan a nih angin Gurung-a chhungte hnenah zangnadawmna Rs. nuai 25 pek a ni dawn a, chief secretary VB Pathak chuan,"Hetiang thihna angah hi chuan zangnadawmna hi pek a ni ngai lo. Mahse, a chhui tura committee dinin rawtna a neih anga zangnadawmna pek mai hi sorkar chuan ṭha a ti a, a pawmpui angin pek a ni ang," tiin a sawi.