Manipur-ah ANSAM-in kawng dang dawn

All Naga Students' Association, Manipur (ANSAM) chuan Naga awmna chin huam chhungah kawng an dan leh tur thu an sawi.

ANSAM chuan an hnuaia peng leh unit hrang hrangte chuan nawrh huaihawta kawng an dan chu chhunzawm leh an tum thu sawiin, Manipur sorkarin October 26, 2023 Memorandum of Agreement (MoA) an ziah anga hma an la lo a nih chuan nasa zawka chet an tum thu an sawi. MoA-ah hian state sorkar chuan boruak awm dan a zira Manipur-a internet connection pek chhuah chhunzawm leh a intiam a, hei bakah hian academic session khat atana contract basis-a a rawih tur, assistant professor lakna tur result chu November 2 hmaa tihchhuah a lo tiam bawk. "Sorkar thupek anga state chhunga internet ban kalpui chhunzawm tur avang hian ANSAM chu kan lo lawm lo hle. Hei hian MoA an ziah point pakhatna a kalh nghal a ni," tiin Manipur sorkarin MoA anga hma a la lo a nih chuan Manipur-a Naga chenna chin zawng zawngah kawng dan an tum thu an sawi a ni.

Kawng dan chu khauh taka kalpui tur leh, an dikna leh chanvo humna atan bakah, MoA anga thil kalpui tura nawrna a ni tih hre chunga an duty-na chin zela ṭhahnemngai turin ANSAM chuan an hnuaia unit hrang hrangte an chah.