Manipur : Tribal mipa thahna video darh

Tribal mipa, kum 31 mi, July 2-a a lu tan a nih lai leh Churachandpur leh Bishnupur district inrinaa hal a nih lai video chu Inrinni khan social media lamah theh darh a ni. Police-te chuan hemi kaihhnawihah hian tu mah an la man loh thu leh video chu an la zir chian mek thu an sawi.

Video-a a lu an tansak hi David Tuolor nia hriat a ni a, kawr dum ha mipa rual, an hmel lang thei lote'n eng hnam nge a nih zawta an beng leh sawisak a nih lai pawh a lang tel. A sawisatute hian David hi Hmar hnam a nih leh nih loh pawh an zawt bawk. David hian Kom hnam a nih thuin a chhang a ni. Hemi ni vek hian David hi an khua, Chinglangmei-ah thia chhar a ni a, a lu hi mau palah khai niin, a taksa erawh hal a ni thung.

David Tuolor thah a nih chungchangah hian a pa Lalkhumlien chuan August 1 khan National Human Rights Commission (NHRC)- ah complaint theh lutin, mipa rual Aarambai Tenggol leh Meitei Leepun mi nia hriatte, state police-in an kaihhruaite chuan Chinglangmei khuaah hian Kuki-Zomi-Hmar tribal mite an rawn zawn thu leh, heng mite hian a fapa chu man a an sawisak hnuah an thah thu a tarlang a ni.

Churachandpur district-ah hian Kuki-Zo hnam te hi an tam ber a, hetih lai hian a ṭhenawm chiah district, Bishnupur erawh chu Meitei tamna hmun a ni thung. District pahnihte inrina hi buffer zone anga puan a ni a, May 3-a tualchhung buaina a chhuah hnuah helaiah hian hnam pahnihte intihbuaina hi a thleng fo a ni.

Zirlaite NRC hman phutin nuar

Manipur-a zirlai pawl eng emaw zat chuan Manipur-a National Register of Citizenship (NRC) hman phutin nawrh an huaihawt. NRC hman phuta nuar zingah hian AMSU, MSF, DESAM, KSA, SUK leh AIM zirlai pawlte an tel.

Nawrh huaihawtte hian kawng zawhin Kwakeithei-a Imphal college aṭangin bul an ṭan a, Tidim road zawhin Raj Bhavan kawtah an kawngzawh an titawp a ni. Raj Bhavan kawtah hian ṭhuin an thil phutte an aupui chhunzawm a, police leh security force eng emaw zatte chu a hmunah hian awm mah se, buaina chhuak erawh a awm lo thung. Zirlaite hian NRC chu an state-a hman an duh thu tlangaupuiin Myanmar, Nepal leh Bangaldesh aṭanga raltlan leh dan loa lo lutte zawn chhuah leh thawn let an duhna thusawi hrang hrang placard an keng hlawm a ni.

Kawngzawh an tihtawp hnu hian zirlai pawl paruk hruaitute chuan meeting neiin an state-a NRC hman pawimawhna chu an sawiho. An spokesperson, Mayengbam Somorjit chuan pawn lam mi an state-a khawsate avanga an state mihring dinhmun a buai thu sawiin, central emaw state sorkarin emaw NRC hmang tura hmalakna an neih loh thu leh, hun rei tak hmang tura an phut tawh thu a tarlang bawk.