Tualchhung ṭawng chawisan kan ngaipawimawh ber : CM Sangma

Meghalaya chief minister Conrad K. Sangma chuan sorkarin zir mi leh ziaktute sum lama ṭanpuina pein tualchhung ṭawng chawisanna tur atan zir bingna leh chawi larna kawngah hma an lak tur thu a sawi.

CM hian Shillong-a Babu Hajom Kissar Sing Memorial lecture-ah thu sawiin,"Khasi leh Garo ṭawngte chawisanna tur atan hian kan zavaia kan ṭanho a, khawtlang anga tha kan thawhho a ngai a ni. Hei chauh hi kan ṭawng leh kan culture te kan vawn him theihna tur kawng a ni," tiin, state sorkar chuan central sorkar hnenah Khasi leh Garo ṭawngte chu India constitution-a eight schedule hnuaia dah lut tura an ngen reng thu a sawi. Sangma chuan culture leh ṭawngte dah ṭhat theihna tur kawng chu a pawimawh thu sawiin, state sorkar pawhin chumi tihhlawhtlin theihna tur chu a ngaihtuah reng thu leh, ziak leh zir bingna te chu an ṭangkai hle tur thu a sawi bawk.

"He policy atan hian ruahmanna siam mek a ni a, pawisa pawh ngaihtuah a ni ang. Hemi kaltlang hian kan hnam leh khawtlang kil hrang hrang zir chianna nei duhte tan kawng hawn a ni ang. Hei hi kan hnam leh culture chhuan lo la awm turte hmuh theiha a awmna tur kawng a ni," a ti. Meghalaya Legislative assembly pawhin language orientation programme an kalpui mek thu sawi bawkin, he programme hnuaiah hian Garo Hill aṭanga MLA te chu Khasi ṭawng zirtir an nih dawn bakah Khasi Jaintia Hill aṭanga MLA te chu Garo ṭawng zirtir an ni bawk ang.