Assam-in Ayurvedic hospital neih belh

Union Minister of Ayush, Sarbananda Sonowal chuan Assam, Goalpara district-a Dudhnoi-ah khum 50 awmna Ayurvedic hospital a hawng. Hei hi Assam-a thla khat chhunga Ayurvedic hospital an hawn pahnihna a ni.

Hospital hi laboratory changtlung tak leh yoga unit bakah, infertility clinic te, Panchakarma centre leh hmanraw ṭul dang zawng zawng pawh dah a ni bawk. Tin, OPD leh IPD service pawh Ayurvedic hospital tharah hian kalpui a ni nghal a ni. Hospital hawnnaah hian Sonowal chuan thla ruk chhung khan Assam-a Ayush Health and Wellness Centre (AHWC) 289-ah damlo 78,026 an enkawl tawh thu a tarlang. "January leh September 2023 chhung data aṭanga kan hmuh angin Ayush enkawlna hi mi 78,026 hnenah pek a ni tawh a, Ayush Ministry hian Assam hnenah hian AHWC din nan Rs. vbc 121.75 a pe tawh bawk a ni. AHWC bakah hian Ayush hospital, zirna in leh damdawi pek chhuahna leh Ayush public health program atan hman a ni bawk," tiin a sawi. Sonowal hian Ayush hmanga inenkawlna hian north-east-a state dangah Ayush hlutna a thlen a beisei thu sawiin, tuna hospital hawn tak, Dudhnoi campus chu helai chhehvela Ayush centre lian ber tura ruahmanna a awm thu a sawi bawk. X-ray leh ECG khawl te, USG te, inzaina hmun leh, Kharasutra bakah nau neihna pindan thlenga thuam tum a nih thu a sawi a ni. "State chhunga healthcare siam ṭhat nan Ayush hmanga inenkawlna leh a dangte pawh Assam-ah hian siam leh din belh zel kan tum a ni," a ti.

2014 aṭang khan sorkar laipui hian Northeast-ah hian Ayush hmang bika inenkawlna damdawi in hi 33 din a ni tawh a, heng zinga pakua hi hman mek a ni. AHWC 879 din zingah 492 chu hman theih mekin a awm bawk. Sonowal hian Kaliabor, Kokrajhar, Morigaon leh Baksa ah te Ayush hospital hi din ve a la ni htur thu sawi bawkin, Diphu leh Balaji-ah te khum 10 awmna damdawi in din nih thuai tur thu a sawi bawk.