JNU zirlaiten Sharmila an thlawp

Jawaharlal Nehru University (JNU) Students’ Union President Kanhaiya Kumar chuan sipai hnena thuneihna sang pekna dan, Armed Forces Special Powers Act, 1958 (AFSPA) duh loh vanga hun rei tak chhung chaw nghei tawh Irom Shermila Chanu chu a thlawp tlat thu a sawi.

Irom Sharmila hian kum 2000 November thla aṭang khan Manipur-a hman mek sipaiten an mi rinhleh zawng kah theihna dan 'Armed Forces Special Powers Act, 1958' hlih phutin tun theng hian chaw nghei a la kalpui a ni. Hei hi JNU zirlai pawl hruaitu, India dodal zawnga chea puh a nih avanga man Kanhaiya Kumar chuan a thlawp tih a sawi a, AFSPA hi human rights leh fundamental rights kalh a ni, a ti.

Kumar chuan sawi chhun-zawmin, Sharmila hi Delhi a kal ṭumin a pualin JNU chuan hun a buatsaih tih a sawi a, "Hei hi AFSPA kan duh loh zia leh Sharmila kan thlawp zia tih lanna a ni" a ti. A mi mal tak pawhin Sharmila chua ngaihsan thu leh, Delhi a kal tuma inkawmna hun remchang an nei lo chu pawi a tih thu a sawi bawk.

Sharmila hi judicial custody-a dah a ni a, a chaw nghei mek titawp tur hian Manipur state minister leh mi ṭhenkhat chuan an nawr ve reng bawk. Mahse Sharmila hian ASFPA chu hlih a nih hma loh chuan a thawk tawp rak thleng pawha dodal a tum thu a sawi a, mi tam tak thlawptu an awm ve bawk.

International Women`s Day denchhenin Sharmila hi a awm mekna J.N. Institute of Medical Sciences Imphal-ah Mirabai leh Chief Minister Okram Ibobi nupui Okram Landho te chuan an tlawh. He mi ṭum hian Sharmila chuan, kum tam tak harsa taka a lo beih tawh tihtawp chu thil theih loh thu a sawi a, state sorkar chuan a mit a tidel lui tlat a ni tiin, Tripura sorkar hian AFSPA hi duh hun huna hlih theih a nih zia a tichiang tiin a sawi.

Mirabai chuan AFSPA chu sorkar laipui thuneihna hmang chauha hlih theih a nih thu a sawiin, state sorkar pawhin sorkar laipuiah a nawr ve reng niin a sawi bawk. Sharmila chu a chaw nghei titawp turin a ngen a, AFSPA hlih a nih theih nan hian state anga ṭanrual a ṭul zawk thu a sawi a ni.

All Manipur Working Jour-nalists’ Union (AMWJU) te chuan an president Wang-khem-cha Shyamjai hoin Inrinni khan Jawaharlal Nehru University zirlaite interview-na hun an nei. Zirlaite nen hian JNU Complex-ah hun an hmang a, he huna thu-sawitu Jawaharlal Nehru Uni-versity Students Union (JNUSU) president Kanhaiya Kumar chuan, Sharmila thiltih chu Manipur state tan chauh ni lo, India ram pum tana thil ṭha a nih thu a sawi.

Manipur-a AFSPA hman mek hnuaiah hian sipaite chuan an mi rinhlelh zawngte kap turin thuneihna an nei a, hei hi human rights bawhchhiatna nih thu sawiin Shermila duhdan chu an thlawp tlat tih a sawi. Kanhaiya chuan, sorkar chuan JNU chauh a bitum lo tih sawiin, Ambedkar Pariyal Study Centre leh Hyde-rabad Central University te chu he thil thlen hma hian buaina an lo nei tawh tih a sawi.Tunah hian JNU bakah Alighar Muslim University leh Allahabad Central University te chuan buaina an tawk mek tih a sawi bawk.

Kumar chuan 'Armed Forces Special Powers Act, 1958' hlih a nih theih nana beitu Sharmila chu a tawp thleng an thlawp tur thu a sawi a ni.